Saṃyuttanikāyo

Paṭhamo bhāgo
-----------

Sagāthavaggo
1. Devatāsaṃyuttaṃ

1. Naḷavaggo

Namo tassa bhagavato arahato sammāsambuddhassa.

1. 1. 1.

Oghataraṇasuttaṃ.

1. Evammesutaṃ ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Atha kho aññatarā devatā abhikkantāya rattiyā abhikkantavaṇṇā kevalakappaṃ jetavanaṃ obhāsetvā yena bhagavā tenupasaṅkami, upasaṅkamitvā bhagavantaṃ abhivādetvā ekamantaṃ aṭṭhāsi. Ekamantaṃ ṭhitā kho sā devatā bhagavantaṃ etadavoca:

Kathannutvaṃ mārisa, oghamatarīti?

(Bhagavā:)
Appatiṭṭhaṃ khvāhaṃ āvuso anāyūhaṃ oghamatarinti.
Yathā kathaṃ pana tvaṃ mārisa appatiṭṭhaṃ anāyūhaṃ oghamatarīti?

(Bhagavā:)
Yadā svāhaṃ āvuso santiṭṭhāmi. Tadāssu saṃsīdāmi. Yadā svāhaṃ āvuso āyūhāmi tadāssu nibbuyhāmi1. Evaṃ khvāhaṃ āvuso appatiṭṭhaṃ anāyūhaṃ oghamatarintī.
(Devatā:)

Cirassaṃ vata passāmi2 brāhmaṇaṃ parinibbutaṃ,
Appatiṭṭhaṃ anāyūhaṃ tiṇṇaṃ loke visattikaṃ.

1. Nivayhāmi- syā. 2. Passāma - sī. 1. 2.

[BJT Page 004] [\x 4/]

4. Idamavoca sā devatā. Samanuñño satthā ahosi.

Atha kho sā devatā "samanuñño me satthā'ti ti bhagavantaṃ abhivādetvā padakkhiṇaṃ katvā tatthevantaradhāyīti.

1. 1. 2.
Nimokkhasuttaṃ. 1

2. Evamme sutaṃ2. Ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme.

[PTS Page 002. [\q 2/] ] Atha kho aññatarā devatā abhikkantāya rattiyā abhikkantavaṇṇā kevalakappaṃ jetavanaṃ obhāsetvā yena bhagavā tenupasaṅkami. Upasaṅkamitvā bhagavantaṃ abhivādetvā ekamantaṃ aṭṭhāsi. Ekamantaṃ ṭhitā kho sā devatā bhagavantaṃ etadavoca:
Jānāsi no tvaṃ mārisa, sattānaṃ nimokkhaṃ pamokkhaṃ vivekanti?
(Bhagavā:)
Jānāmi3 khvāhaṃ āvuso sattānaṃ nimokkhaṃ pamokkhaṃ vivekanti.
(Devatā:)
Yathā kathampana tvaṃ mārisa jānāsi sattānaṃ nimokkhaṃ pamokkhaṃ vivekanti?
(Bhagavā:)
Nandībhavaparikkhayā saññāviññāṇasaṅkhayā,
Vedanānaṃ nirodhā upasamā evaṃ khvāhaṃ āvuso jānāmi.
Sattānaṃ nimokkhaṃ pamokkhaṃ vivekanti.

1. 1. 3.
Upanīyati4suttaṃ.

3. Sāvatthiyaṃ-
Atha5 kho sā devatā bhagavato santike imaṃ gāthaṃ abhāsi:

Upanīyati jīvitamappamāyu jarūpanītassa na santi tāṇā,
Etaṃ bhayaṃ maraṇe pekkhamāno puññāni kayirātha sukhāvahānīti.
(Bhagavā:)
Upanīyati jīvitamappamāyu jarūpanītassa na santi tāṇā
Etaṃ bhayaṃ maraṇe pekkhamāno lokāmisaṃ pajahe santipekkhoti.

1. Buddha sīhanāda suttaṃ nāmetaṃ. - Aṭṭhakathā. 2. Sāvatthinidānaṃ, -machasaṃ, 3. Jānāma-sī1, 2. 4. Upanīya-machasaṃ. Upaneyya - syā, [pts 5.] Ekamantaṃ ṭitā. - Machasaṃ.

[BJT Page 006] [\x 6/]
1. 1. 4
Accentisuttaṃ
4. Sāvatthiyaṃ -1

[PTS Page 003] [\q 3/]
Ekamantaṃ ṭhitā kho sā devatā bhagavato santike imaṃ gāthaṃ abhāsi:

Accenti kālā tarayanti rattiyo vayoguṇā anupubbaṃ jahanti.
Etaṃ bhayaṃ maraṇe pekkhamāno puññāni kayirātha sukhāvahānīti.

(Bhagavā:)
Accenti kālā tarayanti rattiyo vayoguṇā anupubbaṃ jahanti,
Etaṃ bhayaṃ maraṇe pekkhamāno lokāmisaṃ pajahe santipekkhoti.

1. 1. 5,
Katichinda2suttaṃ
5. Sāvatthiyaṃ-
Ekamantaṃ ṭhitā kho sā devatā bhagavantaṃ gāthāya ajjhabhāsi:3

Kati chinde kati jahe kati cuttari bhāvaye,
Kati saṅgātigo " bhikkhu oghatiṇṇo'ti vuccatīti:

(Bhagavā:)
Pañca chinde pañca jahe pañca cuttari bhāvaye,
Pañca saṅgātigo " bhikkhu oghatiṇṇo'ti vuccatīti.

1. 1. 6
Jāgarasuttaṃ

6. Sāvatthiyaṃ -
Ekamantaṃ ṭhitā kho sā devatā bhagavato santike imaṃ gāthaṃ abhāsi:

Kati jāgarataṃ suttā kati suttesu jāgarā,
Katīhi rajamādeti katīhi parisujjhatīti.

(Bhagavā:)
Pañca jāgarataṃ suttā pañca suttesu jāgarā,
Pañcahi rajamādeti pañcahi parisujjhatīti.

1. Idaṃ na dissate -syā. 2. Katijindi - syā. 3. Bhagavato santike imaṃ gāthaṃ abhāsi - machasaṃ.

[BJT Page 008] [\x 8/]

1. 1. 7
Appaṭividitasuttaṃ

7. Sāvatthiyaṃ-
[PTS Page 004. [\q 4/] ]
Ekamantaṃ ṭhitā kho sā devatā bhagavato santike imaṃ gāthaṃ abhāsi:

Yesaṃ dhammā appaṭividitā paravādesu nīyare,
Suttā te nappabujjhanti kālo tesaṃ pabujjhitunti

(Bhagavā:)
Yesaṃ dhammā suppaṭividitā1paravādesu na nīyare,
Sambuddhā sammadaññāya2 caranti visame samanti.

1. 1. 8
Susammuṭṭhasuttaṃ

8. Sāvatthiyaṃ-
Ekamantaṃ ṭhitā kho sā devatā bhagavato santike imaṃ gāthaṃ abhāsi:
Yesaṃ dhammā susammuṭṭhā paravādesu nīyare,
Suttā te nappabujjhanti kālo tesaṃ pabujjhitunti
(Bhagavā:)
Yesaṃ dhammā asammuṭṭhā paravādesu na nīyare,
Sambuddhā sammadaññāya2 caranti visame samaṃ.

1. 1. 9
Namānakāmasuttaṃ.
9. Sāvatthiyaṃ -
Ekamantaṃ ṭhitā kho sā devatā bhagavato santike imaṃ gāthaṃ abhāsi:

Na mānakāmassa damo idhatthi na monamatthi asamāhitassa,
Eko araññe viharaṃ pamatto na maccudheyyassa tareyya pāranti.

(Bhagavā:)
Mānaṃ pahāya susamāhitatto sucetaso sabbadhi vippamutto,
Eko araññe viharaṃ appamatto sa maccudheyyassa tareyya pāranti.

1. Supaṭividitā - syā. 2. Tesambuddhā sammadakkhā -machasaṃ [pts.] Sampadaññāya -si1.
[BJT Page 010] [\x 10/]

1. 1. 10 Araññasuttaṃ
10. Sāvatthiyaṃ-

[PTS Page 005. [\q 5/] ]
Ekamantaṃ ṭhitā kho sā devatā bhagavantaṃ gāthāya ajjhabhāsi:

Araññe viharantānaṃ santānaṃ brahmacārinaṃ,
Ekabhattaṃ bhuñjamānānaṃ kena vaṇṇo pasīdatīti.

(Bhagavā:)

Atītaṃ nānusocanti nappajappanti'nāgataṃ1,
Paccuppannena yāpenti tena vaṇṇo pasīdati.
Anāgatappajappāya atītassānusocanā,
Etena bālā sussanti naḷova harito lutoti.

Naḷavaggo paṭhamo.

Tatruddānaṃ,
Oghaṃ nimokkhaṃ upanīyati accenti katichindi ca, 2
Jāgaraṃ appaṭividitā susammuṭṭhānamānakāmo3
Araññe dasamo4 vutto vaggo tena pavuccati.

2. Nandanavaggo

1. 2. 1
Nandanasuttaṃ

11. Evamme sutaṃ ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Tatra kho bhagavā bhikkhū āmantesi bhikkhavoti. Bhadanteti te bhikkhū bhagavato paccassosuṃ. Bhagavā etadavoca:

Bhūtapubbaṃ bhikkhave aññatarā tāvatiṃsakāyikā devatā nandanavane5 accharāsaṅghaparivutā dibbehi pañcahi kāmaguṇehi samappitā samaṅgībhūtā paricārayamānā6 tāyaṃ velāyaṃ imaṃ gāthaṃ abhāsi:

Na te sukhaṃ pajānanti ye na passanti nandanaṃ,
Āvāsaṃ naradevānaṃ tidasānaṃ yasassinanti.

[PTS Page 006. [\q 6/] ] Evaṃ vutte bhikkhave aññatarā devatā taṃ devataṃ gāthāya paccabhāsi:

Na tvaṃ bāle vijānāsi 7 yathā arahataṃ vaco,
Aniccā sabbe saṅkhārā8 uppādavayadhammino,
Uppajjitvā nirujjhanti tesaṃ vūpasamo sukhoti.

1. Nappajappamanāgataṃ. - Syā. Anappajappantanāgataṃ- sī. 2. Kati jīndatha - katthaci 3. Susammuṭṭhānamānakāminā- katthaci 4. Dasamo araññe-sīmu. 1. 5. Nandane vane - machasaṃ 6. Paricāriyamānā - syā. [Pts 7.] Pajānāsi - katthaci 8. Sabbasaṅkhārā - machasaṃ. -[Pts:]

[BJT Page 012] [\x 12/]

1. 2. 2
Nandati1suttaṃ.
12. Sāvatthiyaṃ-

Ekamantaṃ ṭhitā kho sā devatā bhagavato santike imaṃ gāthaṃ abhāsi:

Nandati puttehi puttimā gomiko2 gohi tatheva nandati,
Upadhī hi narassa nandanā na hi so nandati yo nirūpadhīti3
(Bhagavā:)
Socati puttehi puttimā gomiko gohi tatheva socati,
Upadhī hi narassa socanā na hi so socati yo nirūpadhīti.

1. 2. 3
Natthiputtasuttaṃ

13. Sāvatthiyaṃ -
Ekamantaṃ ṭhitā kho sā devatā bhagavato santike imaṃ gāthaṃ abhāsi:

Natthi puttasamaṃ pemaṃ natthi gosamitaṃ dhanaṃ,
Natthi suriyasamā4 ābhā samuddaparamā sarāti.
(Bhagavā:)
Natthi attasamaṃ pemaṃ natthi dhaññasamaṃ dhanaṃ,
Natthi paññāsamā ābhā vuṭṭhi ve paramā sarāti.

1. 2. 4
Khattiyasuttaṃ
14. Sāvatthiyaṃ-

Ekamantaṃ ṭhitā kho sā devatā bhagavato santike imaṃ gāthaṃ abhāsi:

Khattiyo dipadaṃ5 seṭṭho balivaddo6 catuppadaṃ,
Komārī7seṭṭhā bhariyānaṃ yo ca puttāna8 pubbajoti.

(Bhagavā:)

Sambuddho dipadaṃ5 seṭṭho ājānīyo catuppadaṃ,
Sussūsā seṭṭhā bhariyānaṃ yo ca puttānamassavoti.

1. Nandi-syā. 2. Gomā - machasaṃ. 3. Nirupadhīti. -[Pts. 4.] Sūriyasamā-machasaṃ,
5. Dipadaṃ- katthaci. 6. Balībaddo - machasaṃ balībaddho - syā. 7. Kumāri-[pts]
8. Puttānaṃ-[pts.] Sī. 1. 2.

[BJT Page 014] [\x 14/]
1. 2. 5
Sanamāna1suttaṃ
15. Sāvatthiyaṃ -
(Devatā:)
[PTS Page 007. [\q 7/] ]
Ṭhite majjhantike kāle sannisīvesu2 pakkhisu,
Sanateva3 brahāraññaṃ4 taṃ bhayaṃ paṭihāti manti.
(Bhagavā:)

Ṭhite majjhantike kāle sannisīvesu2 pakkhisu,
Sanateva brahāraññaṃ4 sā ratī5 paṭibhāti manti.

1. 2. 6
Niddātandisuttaṃ

16. Sāvatthiyaṃ-
(Devatā:)
Niddā tandi6 vijambhikā7 aratī bhattasammado,
Etena nappakāsati ariyamaggo idha pāṇinanti.
(Bhagavā:)
Niddaṃ tandiṃ vijambhikaṃ8 aratiṃ bhattasammadaṃ
Viriyena 9 naṃ paṇāmetvā ariyamaggo visujjhatīti.

1. 2. 7
Dukkarasuttaṃ

17. Sāvatthiyaṃ-
(Devatā:)

Dukkaraṃ duttitikkhañca abyattena hi 10 sāmaññaṃ,
Bahū ti tattha sambādhā yattha bālo visīdatīti.

(Bhagavā:)

Katihaṃ careyya sāmaññaṃ cittaṃ ce na nivāraye, 11
Pade pade visīdeyya saṅkappānaṃ vasānugo.

Kummova aṅgāni sake kapāle samodahaṃ bhikkhu manovitakke,
Anissito aññamaheṭhayāno parinibbuto na upavadeyya12 kañcīti.

1. Sakamāna-sīmu. 2. Syā [pts. 2.] Sannisintesu-sīmu. 2. 3. Palāteva-syā. 4. Mahāraññaṃ-syā [pts.] Sīmu. 2. 5. Sārati-machasaṃ 6. Tandi-machasaṃ, syā, [pts. 7.] Vijambhikā-machasaṃ vijimbhikā-syā 8. Vijambhitaṃ -machasaṃ, vijimbhikaṃ-syā 9. Vīriyena, machasaṃ, 10. Ca - machasaṃ [pts. 11.] Nivāreyya-syā [pts.]
12. Nupavadeyya-machasaṃ, syā.

[BJT Page 016] [\x 16/]

1. 2. 8
Hirisuttaṃ
18. Sāvatthiyaṃ-
(Devatā:)
Hirīnisedho puriso ko ci lokasmiṃ vijjati,
Yo nindaṃ appabodhati asso bhadro kasāmivāti.

(Bhagavā:)
Hirīnisedhā tanuyā ye caranti sadā satā,
Antaṃ dukkhassa pappuyya caranti visame samanti.

1. 2. 9.
Kuṭikāsuttaṃ
19. Sāvatthiyaṃ-
(Devatā:)
[PTS Page 008. [\q 8/] ]
Kacci te kuṭikā natthi kacci natthi kulāvakā,
Kacci santānakā natthi kacci muttosi bandhanāti.

(Bhagavā:)
Taggha me kuṭikā natthi taggha natthi kulāvakā,
Taggha santānakā natthi taggha mutto'smi bandhanāti.

(Devatā:)
Kintāhaṃ kuṭikaṃ brūmi kinte brūmi kulāvakaṃ,
Kinte santāna1kaṃ brūmi kintāhaṃ brūmi bandhananti.

(Bhagavā:)
Mātaraṃ kuṭikaṃ brūsi bhariyaṃ brūsi kulāvakaṃ,
Putte santānake brūsi taṇhaṃ me brūsi bandhananti.
(Devatā:)
Sāhu te kuṭikā natthi sāhu natthi kulāvakā,
Sāhu santānakā natthi sāhu mutto'si bandhanā'ti.

1. Santānake-sī mu. , 2. Sī. 1, 2.

[BJT Page 018] [\x 18/]

1. 2. 10
Samiddhisuttaṃ

20. Evamme sutaṃ ekaṃ samayaṃ bhagavā rājagahe viharati tapodārāme.

Atha kho āyasmā samiddhi rattiyā paccūsasamayaṃ paccuṭṭhāya yena tapodā tenupasaṅkami gattāni parisiñcituṃ. Tapode gattāni parisiñcitvā paccuttaritvā ekacīvaro aṭṭhāsi gattāni pubbāpayamāno. 1.

Atha kho aññatarā devatā abhikkantāya rattiyā abhikkantavaṇṇā kevalakappaṃ tapodaṃ obhāsetvā yenāyasmā samiddhi tenupasaṅkami. Upasaṅkamitvā vehāsaṃ ṭhitā āyasmantaṃ samiddhiṃ gāthāya2 ajjhabhāsi:

Abhutvā bhikkhasi bhikkhu na hi bhutvāna bhikkhasi,
Bhutvāna bhikkhu bhikkhassu mā taṃ kālo upaccagāti.

(Samiddhi:)

[PTS Page 009. [\q 9/] ]
Kālaṃ vo'haṃ na jānāmi channo kālo na dissati,
Tasmā abhutvā bhikkhāmi mā maṃ kālo upaccagāti.

Atha kho sā devatā paṭhaviyaṃ3 patiṭṭhahitvā āyasmantaṃ samiddhiṃ etadavoca:

Daharo tvaṃ bhikkhu pabbajito susukālakeso bhadrena4 yobbanena samannāgato paṭhamena vayasā anikīḷitāvī5 kāmesu. Bhuñja bhikkhu mānusake kāme. Mā sandiṭṭhikaṃ hitvā kālikaṃ anudhāvīti.

(Samiddhi:)
Na khvāhaṃ āvuso sandiṭṭhikaṃ hitvā kālikaṃ anudhāvāmi. Kālikañca khvāhaṃ āvuso hitvā sandiṭṭhikaṃ anudhāvāmi. Kālikāhi āvuso kāmā vuttā bhagavatā bahudukkhā bahūpāyāsā ādīnavo ettha bhiyyo6. Sandiṭṭhiko ayaṃ dhammo akāliko ehipassiko opanayiko7 paccattaṃ veditabbo viññūhīti.

(Devatā:)
Kathañca bhikkhu kālikā kāmā vuttā bhagavatā bahudukkhā bahūpāyāsā ādīnavo ettha bhiyyo. Kathaṃ sandiṭṭhiko ayaṃ dhammo akāliko ehi passiko opanayiko paccattaṃ veditabbo viññūhīti.

(Samiddhi:)

Ahaṃ kho āvuso navo acirapabbajito adhunāgato imaṃ dhamma vinayaṃ. Na khvāhaṃ8 sakkomi vitthārena ācikkhituṃ. Ayaṃ so bhagavā arahaṃ sammāsambuddho rājagahe viharati tapodārāme. Taṃ bhagavantaṃ upasaṅkamitvā etamatthaṃ puccheyyāsi9. Yathā te bhagavā vyākaroti, 10 tathā naṃ dhāreyyāsī"ti.

1. Sukkhāpayamāno-syā. [Pts. 2.] Ṭhitā imāya gāthāya-sī2. 3. Pathaviyaṃ - machasaṃ [pts. 4.] Bhaddena - sī 1. 5. Anikkīḷitāvī - machasaṃ - syā. [Pts. 6.] Bhīyo-[pts 7.] Opaneyyiko- machasaṃ 8. Natāhaṃ - machasaṃ, syā. 9. Pucchamachasaṃ, syā. 10. Khyākarotimachasaṃ, syā.

[BJT Page 020] [\x 20/]
(Devatā:)

Na kho bhikkhu sukaro so bhagavā amhehi upasaṅkamituṃ. Aññāhi mahesakkhāhi devatāhi parivuto. Sace kho tvaṃ bhikkhu taṃ bhagavantaṃ upasaṅkamitvā etamatthaṃ puccheyyāsi. Mayampi āgaccheyyāma dhammasavaṇāyāti. 1

Evamāvusoti kho āyasmā samiddhi tassā devatāya paṭissutvā2 yena bhagavā tenupasaṅkami. Upasaṅkamitvā bhagavantaṃ abhivādetvā [PTS Page 010. [\q 10/] ] Ekamantaṃ nisīdi. Ekamantaṃ nisinno kho āyasmā samiddhi bhagavantaṃ etadavoca:

Idāhaṃ bhante rattiyā paccūsasamayaṃ3 paccuṭṭhāya yena tapodā tenupasaṅkamiṃ gattāni parisiñcituṃ. Tapode gattāni parisiñcitvā paccuttaritvā ekacīvaro aṭṭhāsiṃ gattāni pubbāpayamāno. Atha kho bhante aññatarā devatā abhikkantāya rattiyā abhikkantavaṇṇā kevalakappaṃ tapodaṃ obhāsetvā yenāhaṃ tenupasaṅkami. Upasaṅkamitvā vehāsaṃ ṭhitā imāya gāthāya ajjhabhāsi:

"Abhutvā bhikkhasi bhikkhu na hi bhutvāna bhikkhasi,
Bhutvāna bhikkhu bhikkhassu mā taṃ kālo upaccagā"ti.

Evaṃ vutte ahaṃ bhante taṃ devataṃ gāthāya paccabhāsiṃ. 4

"Kālaṃ vo'haṃ na jānāmi channo kālo na dissati,
Tasmā abhutvā bhikkhāmi mā maṃ kālo upaccagā"ti.

Atha kho bhante sā devatā paṭhaviyaṃ patiṭṭhahitvā maṃ etadavoca: daharo tvaṃ bhikkhu pabbajito susukālakeso bhadrena yobbanena sammanāgato paṭhamena vayasā, anikīḷitāvī kāmesu. Bhuñja bhikkhu mānusake kāme. Mā sandiṭṭhikaṃ hitvā kālikaṃ anudhāvīti.

Evaṃ vutte' haṃ 5"bhante taṃ devataṃ etadavocaṃ: " na khvāhaṃ āvuso sandiṭṭhikaṃ hitvā kālikaṃ anudhāvāmi. Kālikañca khvāhaṃ āvuso hitvā sandiṭṭhikaṃ anudhāvāmi. "Kālikā hi āvuso kāmā vuttā bhagavatā bahudukkhā bahūpāyāsā ādīnavo ettha bhiyyo. " Sandiṭṭhiko ayaṃ dhammo akāliko ehipassiko opanayiko paccattaṃ veditabbo viññūhīti. "

Evaṃ vutte bhante sā devatā maṃ etadavoca: kathañca bhikkhu kālikā kāmā vuttā bhagavatā bahudukkhā bahūpāyāsā ādīnavo ettha bhīyyo. Kathaṃ sandiṭṭhiko [PTS Page 011. [\q 11/] ] Ayaṃ dhammo akāliko ehipassiko opanayiko paccattaṃ veditabbo viññūhīti.

Evaṃ vutte'haṃ bhante taṃ devataṃ etadavocaṃ: ahaṃ kho āvuso navo acirapabbajito adhunāgato imaṃ dhammavinayaṃ. Na khvāhaṃ sakkomi vitthārena ācikkhituṃ. Ayaṃ so bhagavā arahaṃ sammāsambuddho rājagahe viharati tapodārāme. Taṃ bhagavantaṃ upasaṅkamitvā etamatthaṃ puccheyyāsi. Yathā te bhagavā vyākaroti tathā naṃ dhāreyyāsīti.

1. Dhammassavaṇāyāti - syā. Machasaṃ 2. Paṭissuṇitvā-syā. 3. Pacavūsasamaye- sīmu1, sī 1. 4. Ajjhabhāsiṃ - syā. Sīmu1, si1, 2 5. Vuttāhaṃ. -Machasaṃ syā.

[BJT Page 022] [\x 22/]

Evaṃ vutte bhante sā devatā maṃ etadavoca: " na kho bhikkhu sukaro so bhagavā amhehi upasaṅkamituṃ, aññāhi mahesakkhāhi devatāhi parivuto. Sace kho tvaṃ bhikkhu taṃ bhagavantaṃ upasaṅkamitvā etamatthaṃ puccheyyāsi. Mayampi āgaccheyyāma dhammasavaṇāyā"ti. Sace bhante tassā devatāya saccaṃ vacanaṃ, idheva sā devatā avidūreti.

Evaṃ vutte sā devatā āyasmantaṃ samiddhiṃ etadavoca: puccha bhikkhu, puccha bhikkhu, ayamahaṃ1 anuppattāti.

Atha kho bhagavā taṃ devataṃ gāthāya ajjhabhāsi:

Akkheyya saññino sattā akkheyyasmiṃ patiṭṭhitā,
Akkheyye apariññāya yogamāyanti maccuno.

Akkheyye ca2 pariññāya akkhātāraṃ na maññati,
Tañhi tassa na hotīti yena naṃ vajjā na tassa atthi,
Sace vijānāsi vadehi yakkhāti.

(Devatā:)

Na khvāhaṃ bhante imassa bhagavatā saṅkhittena bhāsitassa vitthārena atthaṃ ājānāmi. Sādhu me bhante bhagavā tathā bhāsatu. Yathāhaṃ imassa bhagavatā saṅkhittena bhāsitassa vitthārena atthaṃ ājāneyyanti. 3.

(Bhagavā:)
[PTS Page 012. [\q 12/] ] Samo visesī udavā4 nihīno yo maññati so vivadetha tena,
Tīsu vidhāsu avikampamāno samo visesīti na tassa hoti,
Sace vijānāsi vadehi yakkha.

(Devatā:)
Imassapi khvāhaṃ bhante bhagavatā saṅkhittena bhāsitassa na vitthārena atthaṃ ājānāmi. Sādhu me bhante bhagavā tathā bhāsatu. Yathāhaṃ imassa bhagavatā saṅkhittena bhāsitassa vitthārena atthaṃ ājāneyyanti. 3

(Bhagavā:)
Pahāsi saṅkhaṃ5na vimāna6 majjhagā acchecchi7 taṇhaṃ idha nāma rūpe,
Taṃ chinnaganthaṃ anīghaṃ nirāsaṃ pariyesamānā nājjhagamuṃ
Devā manussā idha vā huraṃ vā saggesu vā sabbanivesanesu,
Sace vijānāsi vadehi yakkhāti.

(Devatā:)
Imassa khvāhaṃ bhante bhagavatā saṅkhittena bhāsitassa evaṃ vitthārena atthaṃ ājānāmi.
1. Yamahaṃ, -machasaṃ, syā, [pts. 2.] Akkheyyañca - machasaṃ, syā, [pts. 3.] Jāneyyanti-machasaṃ, [pts. 4.] Athavā- sīmu. 2. 5. Kaṅkhāca - sī1, 6. Na ca māna - machasaṃ 2. 7. Acchejji - syā. Sīmu. 2

[BJT Page 024. [\x 24/] ]
(Bhagavā:)
Pāpaṃ na kayirā vacasā manasā kāyena vā kiñcana sabbaloke,
Kāme pahāya satimā sampajāno dukkhaṃ na sevetha anatthasaṃhitanti.

Nandanavaggo dutiyo.
Tatruddānaṃ:
Nandanā nandati ceva natthi puttasamena ca,
Khattiyo sanamāno ca niddā tandi ca dukkaraṃ,
Hiri kuṭikā navamo dasamo vutto samiddhinā'ti.

3. Sattivaggo.

1. 3. 1.
Sattisuttaṃ

21. Sāvatthiyaṃ-
[PTS Page 013. [\q 13/] ] Ekamantaṃ ṭhitā kho sā devatā bhagavato santike imaṃ gāthaṃ abhāsi:1

Sattiyā viya omaṭṭho ḍayhamānova2 matthake,
Kāmarāgappahāṇāya sato bhikkhu paribbaje'ti.

(Bhagavā:)

Sattiyā viya omaṭṭho ḍayhamānova2 matthake,
Sakkāyadiṭṭhippahāṇāya sato bhikkhu paribbaje'ti.

1. 3. 2
Phusatisuttaṃ

22. Sāvatthiyaṃ

Ekamantaṃ ṭhitā kho sā devatā bhagavato santike imaṃ gāthaṃ abhāsi:

Nāphusantaṃ phusati ca phusantaṃ ca tato phuse,
Tasmā phusantaṃ phusati appaduṭṭhappadosinanti.
(Bhagavā:)

Yo appaduṭṭhassa narassa dussati,
Suddhassa posassa anaṅgaṇassa,
Tameva bālaṃ pacceti pāpaṃ,
Sukhumo rajo paṭivātaṃva khitto'ti.

1. Ajajhabhāsī-sīmu. 1. 2. Ḍayhamāne - syā, sīmu. 2. [Pts.]

[BJT Page 026] [\x 26/]

1. 3. 3.
Jaṭāsuttaṃ

23. Sāvatthiyaṃ-

Ekamantaṃ ṭhitā kho sā devatā bhagavantaṃ gāthāya ajjhabhāsi:

Anto jaṭā bahi jaṭā jaṭāya jaṭitā pajā,
Taṃ taṃ gotama pucchāmi ko imaṃ vijaṭaye jaṭanti.

(Bhagavā:)

Sīle patiṭṭhāya naro sapañño cittaṃ paññañca bhāvayaṃ,
Ātāpi nipako bhikkhu so imaṃ vijaṭaye jaṭanti.

Yesaṃ rāgo ca doso ca avijjā ca virājitā,
Khīṇāsavā arahanto tesaṃ vijaṭitā jaṭā.

Yattha nāmañca rūpañca asesaṃ uparujjhati,
Paṭighaṃ rūpasaññā ca etthesā1 chijjate jaṭāti.

1. 3. 4
Manonivāraṇasuttaṃ

24. Sāvatthiyaṃ-
Ekamantaṃ ṭhitā kho sā devatā bhagavato santike imaṃ gāthaṃ abhāsi:

[PTS Page 014. [\q 14/] ] Yato yato mano nivāraye
Na dukkhameti naṃ tato tato,
Sa sabbato manonivāraye
Sa sabbato dukkhā pamuccatīti2.

(Bhagavā:)
Na sabbato mano nivāraye
Mano yatattamāgataṃ, 3
Yato yato ca pāpakaṃ
Tato tato mano nivāraye'ti.

1. 3. 5.
Arahantasuttaṃ

25. Sāvatthiyaṃ-
Ekamantaṃ ṭhitā kho sā devatā bhagavato santike imaṃ gāthaṃ abhāsi:

1. Ettha sā -syā, [pts. 2.] Pamuccati-machasaṃ, sī. Mu. [Pts. 3.] Na mano saṃyatattaṃ-machasaṃ, sayatattaṃ-[pts.]

[BJT Page 028] [\x 28/]

Yo hoti bhikkhu arahaṃ katāvī
Khīṇāsavo antimadehadhārī
Ahaṃ vadāmītipi so vadeyya
Mamaṃ vadantītipi so vadeyyāti.

(Bhagavā:)
Yo hoti bhikkhu arahaṃ katāvī
Khīṇāsavo antimadehadhārī,
Ahaṃ vadāmītipi so vadeyya
Mamaṃ vadantītipi so vadeyya
Loke samaññaṃ kusalo viditvā,
Vohāramattena so vohareyyāti.

(Devatā:)
Yo hoti bhikkhu arahaṃ katāvī
Khīṇāsavo antimadehadhārī,
Mānaṃ nu kho so upagamma bhikkhu
Ahaṃ vadāmītipi so vadeyya
Mamaṃ vadantītipi so vadeyyāti.

(Bhagavā:)

Pahīṇamānassa na santi ganthā
Vidhūpitā mānaganthassa sabbe,
So vītivatto maññanaṃ1 sumedho
[PTS Page 015. [\q 15/] ] Ahaṃ vadāmītipi so vadeyya
Mamaṃ vadantītipi so vadeyya,
Loke samaññaṃ kusalo viditvā
Vohāramattena so vohareyyā'ti.

1. 3. 6.
Pajjotasuttaṃ

26. Sāvatthiyaṃ -

Ekamantaṃ ṭhitā kho sā devatā bhagavato santike imaṃ gāthaṃ abhāsi:

Kati lokasmiṃ pajjotā yehi loko pakāsati2,
Bhagavantaṃ3 puṭṭhumāgamma kathaṃ jānemu taṃ mayaṃ.

Cattāro loke pajjotā pañcamettha na vijjati,
Divā tapati ādicco rattiṃ ābhāti4 candimā,
Atha aggi divārattiṃ tattha tattha pakāsati2,
Sambuddho tapataṃ seṭṭho esā ābhā anuttarā'ti.

1. Maññānā-machasaṃ, yamataṃ-syā [pts. 2.] Pabhāsati-sīmu, 1. Sī1, 3. Bhavantaṃ-[pts 4.] Rattimābhāti-machasaṃ, syā

[BJT Page 030] [\x 30/]
1. 3. 7
Sarasuttaṃ
27. Sāvatthiyaṃ-
Ekamantaṃ ṭhitā kho sā devatā bhagavantaṃ gāthāya ajjhabhāsi.

Kuto sarā nivattanti kattha vaṭṭaṃ na vattati, 1
Kattha nāmañca rūpañca asesaṃ uparujjhatīti.

(Bhagavā:)
Yattha āpo ca paṭhavī tejo vāyo na gādhati,
Ato sarā nivattanti ettha vaṭṭaṃ na vattati, 1
Ettha nāmañca rūpañca asesaṃ uparujjhatī'ti.

1. 3. 8.
Mahaddhanasuttaṃ
28. Sāvatthiyaṃ-

Ekamantaṃ ṭhitā kho sā devatā bhagavantaṃ gāthāya ajjhabhāsi:

Mahaddhanā mahābhogā raṭṭhavanto'pi khattiyā,
Aññamaññābhigijjhanti kāmesu analaṅkatā
Tesu ussukkajātesu2 bhavasotānusārisu,
Kedha3 taṇhaṃ pajahiṃsu ke lokasmiṃ anussukāti

(Bhagavā:)
Hitvā agāraṃ pabbajitā4 hitvā puttaṃ pasuṃ piyaṃ
Hitvā rāgañca dosañca avijjañca virājiya
Khīṇāsavā arahanto te lokasmiṃ anussukā'ti.

1. 3. 9
Catucakkasuttaṃ.

29. Sāvatthiyaṃ-
(Devatā:)
[PTS Page 016. [\q 16/] ] Catucakkaṃ navadvāraṃ puṇṇaṃ lobhena saṃyutaṃ,
Paṅkajātaṃ mahāvīra kathaṃ yātrā bhavissati.

(Bhagavā:)
Chetvā naddhiṃ5 varattañca icchālobhañca pāpakaṃ,
Samūlaṃ taṇhaṃ abbuyha evaṃ yātrā bhavissatī'ti.

1. Vaṭṭati-sī. Mu, 1. [Pts] sī2. 2. Ussukajātesu -syā. 3. Kodha-syā. Gadha -[pts. 4.] Pabbajitvā-[pts 5.] Nandiṃ [pts.]
[BJT Page 032] [\x 32/]

1. 3. 10
Eṇijaṅghasuttaṃ.
30. Sāvatthiyaṃ-
(Devatā:)

Eṇijaṅghaṃ kisaṃ vīraṃ appāhāraṃ alolupaṃ,
Sīhaṃ vekacaraṃ nāgaṃ kāmesu anapekkhinaṃ,
Upasaṅkamma pucchāma kathaṃ dukkhā pamuccatīti.

(Bhagavā:)
Pañcakāmaguṇā loke manochaṭṭhā paveditā,
Ettha chandaṃ virājetvā evaṃ dukkhā pamuccatīti.
Sattivaggo tatiyo.

Tatruddānaṃ:

Sattiyā phusati ceva jaṭā mano nivāraṇā,
Arahantena pajjoto sarā mahaddhanena ca,
Catucakkena navamaṃ eṇijaṅghena te dasāti.

4. Satullapakāyikavaggo.

1. 4. 1
Sabbhisuttaṃ.

31. Evaṃ me sutaṃ ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme.

Atha kho sambahulā satullapakāyikā devatāyo abhikkantāya rattiyā abhikkantavaṇṇā kevalakappaṃ jetavanaṃ obhāsetvā yena bhagavā tenupasaṅkamiṃsu, upasaṅkamitvā bhagavantaṃ abhivādetvā ekamantaṃ aṭṭhaṃsu.

[PTS Page 017. [\q 17/] ] Ekamantaṃ ṭhitā kho ekā devatā bhagavato santike imaṃ gāthaṃ abhāsi:

Sabbhireva samāsetha sabbhi kubbetha santhavaṃ,
Sataṃ saddhammamaññāya seyyo hoti na pāpiyoti.

Atha kho aparā devatā bhagavato santike imaṃ gāthaṃ abhāsi:

[BJT Page 034] [\x 34/]
Sabhireva samāsetha sabbhi kubbetha santhavaṃ,
Sataṃ saddhammamaññāya paññā labbhati1 nāññatoti.

Atha kho aparā devatā bhagavato santike imaṃ gāthaṃ abhāsi:

Sabbhireva samāsetha sabbhi kubbetha santhavaṃ,
Sataṃ saddhammamaññāya sokamajjhe na socatīti.

Atha kho aparā devatā bhagavato santike imaṃ gāthaṃ abhāsi:

Sabbhireva samāsetha sabbhi kubbetha santhavaṃ,
Sataṃ saddhammamaññāya ñātimajjhe virocatīti.

Atha kho aparā devatā bhagavato santike imaṃ gāthaṃ abhāsi:

Sabbhireva samāsetha sabbhi kubbetha santhavaṃ,
Sataṃ saddhammamaññāya sattā gacchanti suggatinti. 2

Atha kho aparā devatā bhagavato santike imaṃ gāthaṃ abhāsi:

Sabhireva samāsetha sabhi kubbetha santhavaṃ,
Sataṃ saddhammamaññāya sattā tiṭṭhanti sātatanti.

Atha kho aparā devatā bhagavantaṃ etadavoca: kassa nu kho bhagavā3 subhāsitanti.

(Bhagavā:)
Sabbāsaṃ vo subhāsitaṃ pariyāyena. Api ca mamāpi4 suṇātha:

[PTS Page 018. [\q 18/] ] Sabhireva samāsetha sabhi kubbetha santhavaṃ,
Sataṃ saddhammamaññāya sabbadukkhā pamuccatīti.

Idamavoca bhagavā. Attamanā tā devatāyo bhagavantaṃ abhivādetvā padakkhiṇaṃ katvā tatthevantaradhāyiṃsūti. 5

1. Paññaṃ labhati-syā. 2. Sugatinti-syā. 3. Bhagava-[pts. 4.] Mamapi-machasaṃ. Mamampi-[pts. 5]Idamavoca-petatthevantaradhāyiṃsūti pāṭho syā, [pts,] potthakesu na dissate
[BJT Page 036] [\x 36/]
1. 4. 2.
Maccharīsuttaṃ.

32. Ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Atha kho sambahulā satullapakāyikā devatāyo abhikkantāya rattiyā abhikkantavaṇṇā kevalakappaṃ jetavanaṃ obhāsetvā yena bhagavā tenupasaṅkamiṃsu. Upasaṅkamitvā bhagavantaṃ abhivādetvā ekamantaṃ aṭṭhaṃsu. Ekamantaṃ ṭhitā kho ekā devatā bhagavato santike imaṃ gāthaṃ abhāsi:

Maccherā ca pamādā ca evaṃ dānaṃ na dīyati,
Puññamākaṅkhamānena1 deyyaṃ hoti vijānatāti.

Atha kho aparā devatā bhagavato santike imā gāthāyo abhāsi:

Yasseva bhīto na dadāti maccharī tadevādadato2 bhayaṃ,
Jighacchā ca pipāsā ca yassa bhāyati maccharī,
Tameva bālaṃ phusati asmiṃ loke paramhi ca.

Tasmā vineyya maccheraṃ dajjā dāna malābhibhu,
Puññāni paralokasmiṃ patiṭṭhā honti pāṇinanti.

Atha kho aparā devatā bhagavato santike imā gāthāyo abhāsi:

Te matesu na mīyanti3 addhānaṃ4 va sahabbajaṃ5,
Appasmiṃ ye pavecchanti esa dhammo sanantano.

Appasmeke pavecchanti bahuneke nadicchare,
Appasmā dakkhiṇā dinnā sahassena samaṃ mitā.

[PTS Page 019. [\q 19/] ] Atha kho aparā devatā bhagavato santike imā gāthāyo abhāsi:

Duddadaṃ dadamānānaṃ dukkaraṃ kamma kubbataṃ,
Asanto nānukubbanti sataṃ dhammo durannayo6.

Tasmā satañca asatañca 7 nānā hoti ito gati,
Asanto nirayaṃ yanti santo saggaparāyaṇāti

Atha kho aparā devatā bhagavantaṃ8 etadavoca: kassa nu kho bhagavā subhāsitanti?

(Bhagavā:)

Sabbāsaṃ vo subhāsitaṃ pariyāyena. Api ca mamāpi suṇātha:

Dhammaṃ care yopi samuñchakaṃ9 caraṃ10 dārañca posaṃ dadamappakasmiṃ,
Sataṃ sahassānaṃ sahassayāginaṃ kalampi nāgghanti tathāvidhassa teti.

1. Puññaṃ ākaṅkhamānena -machasaṃ. 2. Tadevādādato-[pts 3.] Mīyanti-syā. 4. Panthānaṃ-sī. 5. Sahāvajaṃ-syā, sī. Mu. 2. [Pts 6.] Duranvayo -machasaṃ, syā. 7. Asataṃ -machasaṃ, 8. Bhagavato santike - machasaṃ. 9. Samuñjakaṃ- syā. 10. Care. Katthaci

[BJT Page 038] [\x 38/]

Atha kho aparā devatā bhagavantaṃ gāthāya ajjhabhāsi:

Kenesa yañño vipulo mahaggato
Samena dinnassa na agghameti,
Kathaṃ1 sataṃ sahassānaṃ2 sahassayāginaṃ
Kalampi nāgghanti tathāvidhassa teti.

Atha kho bhagavā taṃ devataṃ gāthāya ajjhabhāsi:

Dadanti heke3 visame niviṭṭhā
Chetvā4 vadhitvā atha socayitvā,
Sā dakkhiṇā assumukhā sadaṇḍā
Samena dinnassa na agghameti.
Evaṃ sataṃ sahassānaṃ2 sahassayāginaṃ
Kalampi nāgghanti tathāvidhassa teti.

1. 4. 3.
Sādhusuttaṃ

33. Sāvatthiyaṃ-

[PTS Page 020. [\q 20/] ] Atha kho sambahulā satullapakāyikā devatāyo abhikkantāya rattiyā abhikkantavaṇṇā kevalakappaṃ jetavanaṃ obhāsetvā yena bhagavā tenupasaṅkamiṃsu. Upasaṅkamitvā bhagavantaṃ abhivādetvā ekamantaṃ aṭṭhaṃsu. Ekamantaṃ ṭhitā kho ekā devatā bhagavato santike imaṃ udānaṃ udānesi:

Sādhu kho mārisa dānaṃ.

Maccherā ca pamādā ca evaṃ dānaṃ na dīyati.
Puññamākaṅkhamānena deyyaṃ hoti vijānatāti.

Atha kho aparā devatā bhagavato santike imaṃ udānaṃ udānesi:

Sādhu kho mārisa dānaṃ. Api ca appasmimpi5 sādhu6 dānaṃ.

Appasmeke pavecchanti bahuneke na dicchare,
Appasmā dakkhiṇā dinnā sahassena samaṃ mitāti.

Atha kho aparā devatā bhagavato santike imaṃ udānaṃ udānesi:

Sādhu kho mārisa dānaṃ. Appasmimpi sādhu6 dānaṃ. Api ca saddhāyapi sādhu6 dānaṃ

Dānañca yuddhañca samānamāhu appāpi santā bahuke jinanti,
Appampi ce saddahāno dadāti teneva so hoti sukhī paratthāti.

1. "Kathaṃ" - sī. Mu. [Pts] potthakesu natthi. 2. Sahassāna-syā. 3. Eke-[pts. 4.] Jhatvā -syā. 5. Appakasmimpi- syā, machasaṃ, 6. Sāhu-syā.

[BJT Page 040] [\x 40/]
Atha kho aparā devatā bhagavato santike imaṃ udānaṃ udānesi:

Sādhu kho mārisa dānaṃ. Appasmimpi sādhu1 dānaṃ. [PTS Page 021. [\q 21/] ] Saddhāyapi sādhu1 dānaṃ. Api ca dhammaladdhassapi sādhu1 dānaṃ.

Yo dhammaladdhassa dadāti dānaṃ uṭṭhānaviriyādhigatassa jantu,
Atikkamma so2 vetaraṇiṃ yamassa dibbāni ṭhānāni upeti maccoti.

Atha kho aparā devatā bhagavato santike imaṃ udānaṃ udānesi:

Sādhu kho mārisa dānaṃ. Appasmimpi sādhu1 dānaṃ. Saddhāyapi sādhu1 dānaṃ. Dhammaladdhassa pi sādhu1 dānaṃ. Api ca viceyya dānampi sādhu. 3

Viceyya dānaṃ sugatappasatthaṃ
Ye dakkhiṇeyyā idha jīvaloke,
Etesu dinnāni mahapphalāni
Bījāni vuttāni yathā sukhetteti.

Atha kho aparā devatā bhagavato santike imaṃ udānaṃ udānesi:

Sādhu kho mārisa dānaṃ. Appasmimpi sādhu1 dānaṃ. Saddhāyapi sādhu1 dānaṃ. Dhammaladdhassapi sādhu1 dānaṃ. Viceyya dānampi sādhu. 1 Api ca pāṇesupi sādhu saṃyamo.
Yo pāṇabhūtesu4 aheṭhayaṃ caraṃ parūpavādā na karoti pāpaṃ,
Bhīruṃ pasaṃsanti na hi tattha sūraṃ bhayā hi santo na karonti pāpanti.

Atha kho aparā devatā bhagavantaṃ etadavoca: [PTS Page 022 [\q 22/] .] Kassa nu kho bhagavā subhāsitanti. ?

(Bhagavā:)
Sabbāsaṃ vo subhāsitaṃ pariyāyena. Api ca mamāpi suṇātha:
Saddhāhi dānaṃ bahudhā pasatthaṃ
Dānā ca kho dhammapadaṃva seyyo.
Pubbe ca hi5 pubbatare va santo
Nibbāṇamevajjhagamuṃ sapaññāti.

1. 4. 4.
Nasantisuttaṃ.

34. Ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme.

1. Sāhu - syā. 2. Atikkamma-syā. 3. Sādhudānaṃ - machasaṃ 4. Bhūtāni. -Machasaṃ, syā. 5. Pubbeva hi. Syā. [Pts]

[BJT Page 042. [\x 42/] ]

Atha kho sambahulā satullapakāyikā devatāyo abhikkantāya rattiyā abhikkantavaṇṇā kevalakappaṃ jetavanaṃ obhāsetvā yena bhagavā tenupasaṅkamiṃsu. Upasaṅkamitvā bhagavantaṃ abhivādetvā ekamantaṃ aṭṭhaṃsu. Ekamantaṃ ṭhitā kho ekā devatā bhagavato santike imā gāthāyo abhāsi:

Na santi kāmā manujesu niccā santīdha kamanīyāni yesu baddho,
Yesu pamatto apunāgamanaṃ anāgantā puriso maccudheyyāti.
Chandajaṃ aghaṃ chandajaṃ dukkhaṃ chandavinayā aghavinayo aghavinayā dukkha vinayoti.

Na te kāmā yāni citrāni loke saṅkapparāgo purisassa kāmo,
Tiṭṭhanti citrāni tatheva loke athettha1 dhīrā vinayanti chandaṃ.

[PTS Page 023. [\q 23/] ] Kodhaṃ jahe vippajaheyya mānaṃ saṃyojanaṃ sabbamatikkameyya,
Taṃ nāmarūpasmimasajjamānaṃ2 akiñcanaṃ nānupatanti dukkhā.

Pahāsi saṅkhaṃ na ca mānamajjhagā acchecchi taṇhaṃ idha nāmarūpe,
Taṃ chinnaganthaṃ anīghaṃ nirāsaṃ pariyesamānā nājjhagamuṃ
Devā manussā idha vā huraṃ vā saggesu vā sabbanivesanesūti.

Tañce hi nāddakkhuṃ tathā vimuttaṃ ( iccāyasmā mogharājā:)
Devā manussā idha vā huraṃ vā.
Naruttamaṃ atthavaraṃ narānaṃ ye taṃ namassanti pasaṃsiyā teti?

Pasaṃsiyā tepi bhavanti bhikkhū ( mogharājā'ti bhagavā:)
Ye taṃ namassanti tathā vimuttaṃ,
Aññāya dhammaṃ vicikicchaṃ pahāya saṅgātigā tepi bhavanti bhikkhūti.

1. 4. 5
Ujjhānasaññisuttaṃ.

35. Ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Atha kho sambahulā ujjhānasaññikā devatāyo abhikkantāya rattiyā abhikkantavaṇṇā kevalakappaṃ jetavanaṃ obhāsetvā yena bhagavā tenupasaṅkamiṃsu. Upasaṅkamitvā vehāsaṃ aṭṭhaṃsu. [PTS Page 0024 [\q 24/] .] Vehāsaṃ ṭhitā kho ekā devatā bhagavato santike imaṃ gāthaṃ abhāsi:
1. Atthettha-[pts. 2.] Rūpasmiṃ asajja mānaṃsi. Mu. 1

[BJT Page 44] [\x 44/]

Aññathā santamattānaṃ aññathā yo pavedaye,
Nikacca kitavasse'va bhūttaṃ theyyena tassa taṃ.

(Bhagavā:)

Yaṃ hi kayirā taṃ hi vade yaṃ na kayirā na taṃ vade,
Akarontaṃ bhāsamānānaṃ1 paṭijānanti paṇḍitāti.

Nayidaṃ bhāsitamattena ekantasavaṇena vā,
Anukkamitave2 sakkā yāyaṃ paṭipadā daḷhā,
Yāya dhīrā pamuccanti jhāyino mārabandhanā.

Na ve dhīrā pakubbanti viditvā lokapariyāyaṃ,
Aññāya nibbutā dhīrā tiṇṇā loke visattikanti.

Atha kho tā devatāyo paṭhaviyaṃ patiṭṭhahitvā bhagavato pādesu sirasā nipatitvā bhagavantaṃ etadavocuṃ. Accayo no bhante accagamā yathābālaṃ yathāmūḷhaṃ yathāakusalaṃ, 3 yā mayaṃ bhagavantaṃ āsādetabbaṃ4 amaññimhā. Tāsaṃ no bhante bhagavā accayaṃ accayato patigaṇhātu5 āyatiṃ saṃvarāyā'ti.

Atha kho bhagavā sitaṃ pātvākāsi.

Atha kho tā devatāyo bhīyosomattāya ujjhāyantiyo vehāsaṃ abbhuggañchuṃ.
Ekā devatā bhagavato santike imaṃ gāthaṃ abhāsi:6

Accayaṃ desayantīnaṃ yo ce7na paṭigaṇhati,
Kopantaro dosagaru sa veraṃ paṭimuccati.

(Bhagavā:)
Accayo ce na vijjetha no cidhāpagataṃ8 siyā,
Verāni ca sammeyyuṃ tenīdha kusalo siyā.

(Devatā:)

Kassaccayā na vijjanti kassa natthi apāgataṃ9
Ko sammohamāpādi ko vā 10 dhīro sadā satoti.

1. Bhāsamānaṃ-machasaṃ, 2. Anukkamituṃ ce-[pts 3.] Yathābālā yathāmūḷhā yathā akusalā-katthaci. 4. Apasādetabbaṃ-syā. 5. Paṭiggaṇahātu - machasaṃ. Syā. 6. Avoca-[pts 7.] Yo ce -[pts 8.] No cīdha apahataṃ -syā. 9. Apāhataṃ-syā. 10. Ko ca-machasaṃ [pts.] Kodha - syā.

[BJT Page 046] [\x 46/]
(Bhagavā:)
[PTS Page 025. [\q 25/] ] Tathāgatassa buddhassa sabbabhūtānukampino,
Tassaccayā na vijjanti tassa natthi apāgataṃ,
So na sammohamāpādi sova1 dhīro sadā sato.

Accayaṃ desayantīnaṃ yo ce na paṭigaṇhati,
Kopantaro dosagaru sa veraṃ2 paṭimuccati,
Taṃ veraṃ nābhinandāmi patigaṇhāmi voccayanti.

1. 4. 6
Saddhāsuttaṃ.

36 Ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Atha kho sambahulā satullapakāyikā devatāyo abhikkantāya rattiyā abhikkantavaṇṇā kevalakappaṃ jetavanaṃ obhāsetvā yena bhagavā tenupasaṅkamiṃsu. Upasaṅkamitvā vehāsaṃ aṭṭhaṃsu. Ekamantaṃ ṭhitā kho ekā devatā bhagavato santike imaṃ gāthaṃ abhāsi:
Saddhā dutiyā purisassa hoti no ce assaddhiyaṃ avatiṭṭhati
Yaso ca kittī ca tatvassa hoti
Saggañca so gacchati sarīraṃ pahāyāti. 3

Atha kho aparā devatā bhagavato santike imā gāthāyo abhāsi:

Kodhaṃ jahe vippajaheyya mānaṃ saṃyojanaṃ sabbamatikkameyya,
Taṃ nāmarūpasmimasajjamānaṃ akiñcanaṃ nānupatanti saṅgāti.

Pamādamanuyuñjanti bālā dummedhino janā
Appamādañca medhāvī dhanaṃ seṭṭhaṃ'va4 rakkhati.

Mā pamādamanuyuñjetha mā kāmaratisanthavaṃ
Appamatto hi jhāyanto pappoti paramaṃ sukhanti.

1. 4. 7
Samayasuttaṃ.
37. [PTS Page 026. [\q 26/] ] Evaṃ me sutaṃ, ekaṃ samayaṃ bhagavā sakkesu viharati kapilavatthusmiṃ mahāvane mahatā bhikkhusaṅghena saddhiṃ pañcamattehi bhikkhusatehi sabbeheva arahantehi. Dasahi ca lokadhātūhi devatā yebhuyyena sannipatitā honti bhagavantaṃ dassanāya bhikkhusaṅghañca.
1. So ca-[pts.] Sodha-syā, sīmu. 1. 2. Yaṃveraṃ - sīmu 1. [Pts 3.] Vihāya - machasaṃ 4. Śreṣṭhiva'yi saṃskṛata dharmapadapāṭha'yi.

[BJT Page 048] [\x 48/]

Atha kho catunnaṃ: suddhāvāsakāyikānaṃ devānaṃ1 etadahosi. Ayaṃ kho bhagavā sakkesu viharati kapilavatthusmiṃ mahāvane mahatā bhikkhusaṅghena saddhiṃ pañcamattehi bhikkhusatehi sabbeheva arahantehi. Dasahi ca loka dhātūhi devatā2 yebhuyyena sannipatitā honti bhagavantaṃ dassanāya bhikkhusaṅghañca. Yannūna mayampi3 yena bhagavā tenupasaṅkameyyāma. Upasaṅkamitvā bhagavato santike paccekagāthaṃ4 bhāseyyāmāti.
Atha kho tā devatā2 seyyathāpi nāma balavā puriso sammiñjitaṃ5 vā bāhaṃ pasāreyya, pasāritaṃ vā bāhaṃ sammiñjeyya6, evamevaṃ suddhāvāsesu devesu antarahitā bhagavato purato pāturahaṃsu. 7.

Atha kho tā devatā2 bhagavantaṃ abhivādetvā ekamantaṃ aṭṭhaṃsu. Ekamantaṃ ṭhitā kho ekā devatā bhagavato santike imaṃ gāthaṃ abhāsi:

Mahāsamayo pavanasmiṃ devakāyā samāgatā,
Āgatamha imaṃ dhammasamayaṃ dakkhitāye aparājitasaṅghanti.

Atha kho aparā devatā bhagavato santike imaṃ gāthaṃ abhāsi:

Tatra bhikkhavo samādahaṃsu cittaṃ attano8 ujukamakaṃsu,
Sārathīva nettāni gahetvā indriyāni rakkhanti paṇḍitāti.

[PTS Page 027. [\q 27/] ] Atha kho aparā devatā bhagavato santike imaṃ gāthaṃ abhāsi:

Chetvā khilaṃ9 chetvā palighaṃ10 indakhīlaṃ ūhacca manejā,
Te caranti suddhā vimalā cakkhumatā sudantā susunāgāti.

Atha kho aparā devatā bhagavato santike imaṃ gāthaṃ abhāsi:

Ye keci buddhaṃ saraṇaṃ gatāse na te gamissanti apāyaṃ, 11
Pahāya mānusaṃ dehaṃ devakāyaṃ paripūressantīti.

1. 4. 8.
Sakalikasuttaṃ,

38. Evaṃ me sutaṃ ekaṃ samayaṃ bhagavā rājagahe viharati maddakucchismiṃ migadāye.

Tena kho pana samayena bhagavato pādo sakalikāya khato hoti, bhusā12 sudaṃ bhagavato vedanā vattanti sārīrikā vedanā dukkhā tibbā kharā kaṭukā asātā amanāpā. Tā sudaṃ bhagavā sato sampajāno adhivāseti avihaññamāno.

Atha kho bhagavā catugguṇaṃ saṅghāṭiṃ paññāpetvā dakkhiṇena passena sīhaseyyaṃ kappeti13 pāde pādaṃ accādhāya sato sampajāno.

1. Devatānaṃ- [pts 2.] Devatāyo - syā. 3. Mayaṃ-sīmu1. 4. Paccekagāthā-syā. Paccekaṃ gāthaṃ -machasaṃ, sīmu. 1. 5. Samiñjitaṃ 6. Samiñjeyya-machasaṃ. 7. Pāturahesuṃ - machasaṃ-[pts 8.] Cittamattano - machasaṃ 9. Khīlaṃ -[pts 10.] Palīghaṃ-syā. 11. Apāyabhūmiṃ - machasaṃ, syā [pts 12.] Bhūsā - syā 13. Kappesi- sīmu. 1, [Pts]

[BJT Page 050] [\x 50/]

Atha kho sattasatā satullapakāyikā devatāyo abhikkantāya rattiyā abhikkantavaṇṇā kevalakappaṃ maddakucchiṃ obhāsetvā yena bhagavā tenupasaṅkamiṃsu. Upasaṅkamitvā bhagavantaṃ abhivādetvā ekamantaṃ aṭṭhaṃsu. Ekamantaṃ ṭhitā kho ekā devatā bhagavato santike imaṃ udānaṃ udānesi:

[PTS Page 028. [\q 28/] ] Nāgo vata bho samaṇo gotamo. Nāgavatā1 ca panuppannā2 sārīrikā vedanā dukkhā tibbā kharā kaṭukā asātā amanāpā sato sampajāno adhivāseti avihaññamānoti.

Atha kho aparā devatā bhagavato santike imaṃ udānaṃ udānesi:

Sīho vata bho samaṇo gotamo. Sīhavatā1 ca panuppannā2 sārīrikā vedanā dukkhā tibbā kharā kaṭukā asātā amanāpā sato sampajāno adhivāseti avihaññamānoti.

Atha kho aparā devatā bhagavato santike imaṃ udānaṃ udānesi:

Ājānīyo vata bho samaṇo gotamo. Ājānīyavatā1 ca panuppannā2 sārīrikā vedanā dukkhā tibbā kharā kaṭukā asātā amanāpā sato sampajāno adhivāseti avihaññamānoti.

Atha kho aparā devatā bhagavato santike imaṃ udānaṃ udānesi:

Nisabho vata bho samaṇo gotamo. Nisabhavatā1 ca panuppannā2 sārīrikā vedanā dukkhā tibbā kharā kaṭukā asātā amanāpā sato sampajāno adhivāseti avihaññamānoti.

Atha kho aparā devatā bhagavato santike imaṃ udānaṃ udānesi:

Dhorayho vata bho samaṇo gotamo. Dhorayhavatā1 ca panuppannā2 sārīrikā vedanā dukkhā tibbā kharā kaṭukā asātā amanāpā sato sampajāno adhivāseti avihaññamānoti.

Atha kho aparā devatā bhagavato santike imaṃ udānaṃ udānesi:

Danto vata bho samaṇo gotamo. Dantavatā ca panuppannā sārīrikā vedanā dukkhā tibbā kharā kaṭukā asātā amanāpā sato sampajāno adhivāseti avihaññamānoti.
Atha kho aparā devatā bhagavato santike imaṃ udānaṃ udānesi:

1. Vatāya ca - sīmu. 1. 2. Samuppantā - macasaṃ, syā, [pts.]

[BJT Page 051] [\x 51/]

Passa samādhiṃ subhāvitaṃ cittañca suvimuttaṃ1 nacābhinataṃ nacāpanataṃ na ca sasaṃkhāraniggayhavāritavataṃ2. Yo evarūpaṃ purisanāgaṃ purisasīhaṃ purisājānīyaṃ [PTS Page 029. [\q 29/] ] Purisanisabhaṃ purisadhorayhaṃ purisadantaṃ atikkamitabbaṃ maññeyya, kimaññatra adassanāti.

Pañcavedā sataṃ samaṃ
Tapassī brāhmaṇā caraṃ,
Cittañca nesaṃ na sammā vimuttaṃ
Hīnattarūpā na pāraṅgamā te.

Taṇhādhipannā vata sīlabaddhā
Lūkhaṃ tapaṃ vassasataṃ carantā,
Cittañca nesaṃ na sammā vimuttaṃ
Hīnattarūpā na pāraṅgamā te.

Na mānakāmassa damo idhatthi
Na monamatthi asamāhitassa,
Eko araññe viharaṃ pamatto
Na maccudheyyassa tareyya pāranti.

(Bhagavā:)
Mānaṃ pahāya susamāhitatto
Sucetaso sabbadhi vippamutto,
Eko araññe viharaṃ appamatto
Sa maccudheyyassa tareyya pāranti.

1. 4. 9.
Pajjunna dhītusuttaṃ

39. Evaṃ me sutaṃ ekaṃ samayaṃ bhagavā vesāliyaṃ viharati mahāvane kūṭāgārasālāyaṃ. Atha kho kokanadā pajjunnassa dhītā abhikkantāya rattiyā abhikkantavaṇṇā kevalakappaṃ mahāvanaṃ obhāsetvā yena bhagavā tenupasaṅkami. Upasaṅkamitvā bhagavantaṃ abhivādetvā ekamantaṃ aṭṭhāsi. Ekamantaṃ ṭhitā kho kokanadā3 pajjunnassa dhītā bhagavato santike imā gāthāyo abhāsi.

Vesāliyaṃ vane4 viharantaṃ
Aggaṃ sattassa sambuddhaṃ,
[PTS Page 030. [\q 30/] ] Kokanadāhamasmi abhivande
Kokanadā pajjunnassa dhītā.

Sutameva me5 pure āsi
Dhammo cakkhumatānubuddho,
Sāhaṃdāni sakkhī jānāmi
Munino desayato sugatassa.

1. Vimuttaṃ-[pts 2.] Vāritagataṃ-machasaṃ. 3. Kho sā devatā kokanadā-machasaṃ syā. 4. Vesālivane-katthaci. 5. Sutameca puremachasaṃ, syā.

[BJT Page 054] [\x 54/]

Ye keci ariyadhammaṃ1
Vigarahantā caranti dummedhā,
Upenti roruvaṃ ghoraṃ
Cirarattaṃ dukkhamanubhavanti

Ye ca kho ariyadhamme 2
Khantiyā upasamena upetā,
Pahāya mānusaṃ dehaṃ
Devakāyaṃ paripūressantī'ti.

1. 4. 10.
Cullapajjunnadhītusuttaṃ

40. Evaṃ me sutaṃ:ekaṃ samayaṃ bhagavā vesāliyaṃ viharati mahāvane kūṭāgārasālāyaṃ. Atha kho cullakokanadā pajjunnassa dhītā abhikkantāya rattiyā abhikkantavaṇṇā kevalakappaṃ mahāvanaṃ obhāsetvā yena bhagavā tenupasaṃkami. Upasaṃkamitvā bhagavantaṃ abhivādetvā ekamantaṃ aṭṭhāsi. Ekamantaṃ ṭhitā kho cullakokanadā pajjunnassa dhītā bhagavato santike imā gāthāyo abhāsi:

Idhāgamā vijjupabhāsavaṇṇā
Kokanadā pajjunnassa dhītā,
Buddhañca dhammañca namassamānā
Gāthā cimā atthavatī abhāsi.

[PTS Page 031. [\q 31/] ] Bahunāpi kho naṃ vibhajeyyaṃ
Pariyāyena tādiso dhammo,
Saṃkhittamattaṃ lapayissāmi
Yāvatā me manasā pariyattaṃ.

Pāpaṃ na kayirā vacasā manasā
Kāyena vā kiñcana sabbaloke,
Kāme pahāya satimā sampajāno
Dukkhaṃ na sevetha anatthasaṃhitanti.

Satullapakāyikavaggo catuttho.

Tatruddānaṃ:
Sabbhi maccharinā sādhu nasantujjhānasaññino,
Saddhā samayo sakalikaṃ ubho pajjunnadhītaro'ti.

1. Ariyaṃ dhammaṃ-machasaṃ, syā. 2. Ariye dhamme-machasaṃ, syā. 3. Cūḷa-machasaṃ,

[BJT Page 056] [\x 56/]

5. Ādittavaggo

1.5.1

Ādittasuttaṃ
41. Evaṃ me sutaṃ: ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Atha kho aññatarā devatā abhikkantāya rattiyā abhikkantavaṇṇā kevalakappaṃ jetavanaṃ obhāsetvā yena bhagavā tenupasaṅkami. Upasaṅkamitvā bhagavantaṃ abhivādetvā ekamantaṃ aṭṭhāsi. Ekamantaṃ ṭhitā kho sā devatā bhagavato santike imā gāthāyo abhāsi:

Ādittasmiṃ agārasmiṃ yaṃ nīharati bhājanaṃ,
Taṃ tassa hoti atthāya no ca yaṃ tattha ḍayhati.

Evamādipito1 loko jarāya maraṇena ca,
Nīharetheva dānena dinnaṃ hoti sunīhataṃ.

[PTS Page 032. [\q 32/] ] Dinnaṃ sukhaphalaṃ hoti nādinnaṃ hoti taṃ tathā,
Corā haranti rājāno aggi ḍahati nassati.

Atha antena jahati sarīraṃ sapariggahaṃ,
Etadaññāya medhāvī bhuñjetha ca dadetha ca.
Datvā ca bhutvā ca yathānubhāvaṃ anindito saggamupeti ṭhānanti.

1. 5. 2
Kiṃdadasuttaṃ.
(Devatā:)
42. Kiṃdado balado hoti kiṃdado hoti vaṇṇado.
Kiṃdado sukhado hoti kiṃdado hoti cakkhudo.
Yo ca2 sabbadado hoti taṃ me akkhāhi pucchitoti.

(Bhagavā:)
Annado balado hoti vatthado hoti vaṇṇado,
Yānado sukhado hoti dīpado hoti cakkhudo
So ca sabbadado hoti yo dadāti upassayaṃ,
Amataṃdado ca so hoti yo dhammamanusāsatīti.

1. Evaṃ ādittako. - Machasaṃ syā 2. Ko ca - katthaci.

[BJT Page 058] [\x 58/]
1. 5. 3.
Annasuttaṃ
(Devatā:)
43. Annamevābhinandanti ubhaye devamānusā,
Atha ko nāma so yakkho yaṃ annaṃ nābhinandatīti.

(Bhagavā:)ye naṃ dadanti saddhāya vippasannena cetasā,
Tameva annaṃ bhajati asmiṃ loke parambhi ca,

Tasmā vineyya maccheraṃ dajjā dānaṃ malābhibhū,
Puññāni paralokasmiṃ patiṭṭhā honti pāṇinanti.

1. 5. 4
Ekamūlasuttaṃ

(Devatā:)
44. Ekamūlaṃ dvirāvaṭṭaṃ timalaṃ pañcapattharaṃ,
Samuddaṃ dvādasāvaṭṭaṃ pātālaṃ atarī isīti.

1. 5. 5.
Anomasuttaṃ
(Devatā:)

45. [PTS Page 033. [\q 33/] ] Anomanāmaṃ nipuṇatthadassiṃ paññādadaṃ kāmālaye asattaṃ
Taṃ passatha sabbaviduṃ sumedhaṃ ariye pathe kamamānaṃ mahesinti.

1. 5. 6
Accharāsuttaṃ.
(Devatā:)
46. Accharāgaṇasaṅghuṭṭaṃ pisācagaṇasevitaṃ
Vanantaṃ mohanaṃ nāma kathaṃ yātrā bhavissatīti.

(Bhagavā:)
Ujuko nāma so maggo abhayā nāma sā disā,
Ratho akūjano1 nāma dhammacakkehi saṃyuto.

Hiri tassa apālambo satassa2 parivāraṇaṃ,
Dhammāhaṃ sārathiṃ brūmi sammādiṭṭhipurejavaṃ,

Yassa etādisaṃ yānaṃ itthiyā purisassa vā,
Sa ve etena yānena nibbāṇasseva santike.

Akujjano-syā. 2. Satyassa, - machasaṃ, [pts]

[BJT Page 060] [\x 60/]

1. 5. 7
Vanaropasuttaṃ
(Devatā:)
47. Kesaṃ divā ca ratto ca sadā puññaṃ pavaḍḍhati.
Dhammaṭṭhā sīlasampannā ke janā saggagāminoti.

(Bhagavā:)
Ārāmaropā vanaropā ye janā setukārakā,
Papañca udapānañca ye dadanti upassayaṃ.

Tesaṃ divā ca ratto ca sadā puññaṃ pavaḍḍhati,
Dhammaṭṭhā sīlasampannā te janā saggagāminoti.

1. 5:8.
Jetavanasuttaṃ

48. Idañhi taṃ jetavanaṃ isisaṅghanisevitaṃ
Āvutthaṃ dhammarājena pītisañjananaṃ mama.

(Bhagavā:)
[PTS Page 034. [\q 34/] ] Kammaṃ vijjā ca dhammo ca sīlaṃ jīvitamuttamaṃ,
Etena maccā sujjhanti na gottena dhanena vā.

Tasmā hi paṇḍito poso sampassaṃ atthamattano,
Yoniso vicine dhammaṃ evaṃ tattha visujjhati.

Sāriputtova paññāya sīlenupasamena ca,
Yopi pāragato1 bhikkhu etāva paramo siyā'ti.

1. 5. 9.
Maccharisuttaṃ
(Devatā:)
49. Ye'dha maccharino loke kadariyā paribhāsakā,
Aññesaṃ dadamānānaṃ antarāyakarā narā.

Kīdiso tesaṃ vipāko samparāyo ca kīdiso,
Bhagavantaṃ puṭṭhumāgamma kathaṃ jānemu taṃ mayanti.

(Bhagavā)
Ye'dha maccharino loke kadariyā paribhāsakā,
Aññesaṃ dadamānānaṃ antarāyakarā narā.

1. Pāraṅgato. Sī. Mu, machasaṃ.

[BJT Page 062] [\x 62/]

Nirayaṃ tiracchānayoniṃ yamalokañcupapajjare, 1
Sace enti manussattaṃ daḷidde jāyare kule,
Coḷaṃ piṇḍo ratī khiḍḍā yattha kicchena labbhati.

Parato āsiṃsare2 bālā tampi tesaṃ nalabbhati,
Diṭṭhe3 dhamme savipāko samparāye4 ca duggatīti.

(Devatā:)
Itihetaṃ vijānāma aññaṃ pucchāma gotama,
Ye'dha laddhā manussattaṃ vadaññū vītamaccharā,
Buddhe pasannā dhamme ca saṅghe ca tibbagāravā.

Kīdiso tesaṃ vipāko samparāyo ca kīdiso,
Bhagavantaṃ puṭṭhumāgamma kataṃ jānemu taṃ mayanti.

(Bhagavā:)
Ye'dha laddhā manussattaṃ vadaññū vītamaccharā,
Buddhe pasannā dhamme ca saṅghe ca tibbagāravā,
Ete sagge pakāsenti5 yattha te upapajjare.

[PTS Page 035. [\q 35/] ] Sace enti manussattaṃ aḍḍhe ājāyare kule,
Coḷaṃ piṇḍo ratī khiḍḍā yatthākicchena labbhati.

Parasambhatesu bhogesu vasavattīva modare,
Diṭṭhe3 dhamme savipāko samparāye va suggatīti.

1. 5. 10.
Ghaṭīkārasuttaṃ

(Ghaṭīkāra devatā:)
50. Avihaṃ upapannāse vimuttā satta bhikkhavo,
Rāgadosaparikkhīṇā tiṇṇā loke visattikanti.

Ke ca te ataruṃ saṅghaṃ6 maccudheyyaṃ suduttaraṃ,
Ke hitvā mānusaṃ dehaṃ dibbaṃ yogaṃ7 upaccaguṃ.

Upako palagaṇaḍo ca pukkusāti ca te tayo,
Bhaddiyo bhaddadevo ca bāhudanti ca piṅgiyo. 8
Te hitvā mānusaṃ dehaṃ dibbaṃ yogaṃ7 upaccagunti.

(Bhagavā:)
Kusalī bhāsasi tesaṃ mārapāsappahāyinaṃ,
Kassa te dhammamaññāya acchiduṃ bhavabandhanaṃ.

1. Yamalokupapajjare. Syā. Yamalokaṃupapajjare [pts 2.] Āsighare-machasaṃ 3. Diṭṭheva-sīmu. 2 4. Samparāyo-syā 5. Saggā pakāsanti - machasaṃ. 6. Paṅkaṃ-machasaṃ, sīmu 2, [pts.] Ye ca teva ataruṃsaṅgaṃ-syā. Ke va ke va. Sīmū. 1. 7. Dibbayogaṃ - machasaṃ, syā, [pts. 8.] Khaṇḍadevo ca bāhuraggi ca siṅgiyo - machasaṃ. Piṅgiyo- [pts] khaṇḍadevo ca bāhudanti ca siṅgiyo-syā

[BJT Page 064] [\x 64/]
(Ghaṭīkāra:)
Na aññatra bhagavatā nāññatra tava sāsanā,
Yassa te dhammamaññāya acchiduṃ bhavabandhanaṃ.

Yattha nāmañca rūpañca asesaṃ uparujjhati,
Taṃ te dhammaṃ idhaññāya acchiduṃ bhavabandhananti.

(Bhagavā:)gambhīraṃ bhāsasi vācaṃ dubbijānaṃ sudubbudhaṃ,
Kassa tvaṃ dhammamaññāya vācaṃ bhāsasi īdisanti.

(Ghaṭīkāra:)
Kumbhakāro pure āsiṃ vehaliṅge1 ghaṭīkaro,
Mātāpettibharo āsiṃ kassapassa upāsako.

[PTS Page 036. [\q 36/] ] Virato methunā dhammā brahmacārī nirāmiso,
Ahuvā te sagāmeyyo ahuvā te pure sakhā.

So'haṃ ete2 pajānāmi vimutte satta bhikkhavo,
Rāgadosaparikkhīṇe tiṇṇe loke visattikanti.

(Bhagavā:)
Evametaṃ tadā āsi yathā bhāsasi bhaggava,
Kumbhakāro pure āsi vehaliṅge ghaṭīkaro,
Mātāpettibharo āsi kassapassa upāsako.

Virato methunā dhammā brahmacārī nirāmiso,
Ahuvā me sagāmeyyo ahuvā me pure sakhāti.

(Therā:)
Evametaṃ purāṇānaṃ sahāyānaṃ ahu3 saṅgamo,
Ubhinnaṃ bhāvitattānaṃ sarīrantimadhārinanti.

Ādittavaggo pañcamo.
Tatruddānaṃ:
Ādittaṃ kiṃdadaṃ annaṃ ekamūlamanomiyaṃ,
Accharāvanajetena maccharena ghaṭīkaro'ti.

1Vekaliṅge- machasaṃ, syā. 2. Sobhamete - machasaṃ, syā. 3. Sahāyānamahu- syā.
[BJT Page 066] [\x 66/]

6. Jarāvaggo.
1. 6. 1
Jarāsuttaṃ
51. Sāvatthiyaṃ-

(Devatā:)
Kiṃ su yāva jarā sādhu kiṃ su sādhu patiṭṭhitaṃ,
Kiṃ su narānaṃ ratanaṃ kiṃ su corehi dūharanti.

(Bhagavā:) sīlaṃ yāva jarā sādhu saddhā sādhu patiṭṭhitā.
Paññā narānaṃ ratanaṃ puññaṃ corehi dūharanti.

1. 6. 2.
Ajarasāsuttaṃ

(Devatā:)

52. Kiṃ su ajarasā sādhu kiṃ su sādhu adhiṭṭhitaṃ,
Kiṃ su narānaṃ ratanaṃ kiṃ su corehi'hāriyanti.1 1

(Bhagavā:) [PTS Page 037. [\q 37/] ] Sīlaṃ ajarasā sādhu saddhā sādhu adhiṭṭhitā,
Paññā narānaṃ ratanaṃ puññaṃ corehi'hāriyanti.

1. 6. 3
Mittasuttaṃ.
(Devatā:)
53. Kiṃ su pavasato2 mittaṃ kiṃ su mittaṃ sake ghare,
Kiṃ mittaṃ atthajātassa kiṃ mittaṃ samparāyikanti.

(Bhagavā:) sattho pavasato2 mittaṃ mātā mittaṃ sake ghare,
Sahāyo atthajātassa hoti mittaṃ punappunaṃ,
Sayaṃ katāni puññāni taṃ mittaṃ samparāyikanti.

1. 6. 4.
Vatthusuttaṃ.
(Devatā:)
54. Kiṃ su vatthu manussānaṃ kiṃsūdha paramo3 sakhā,
Kiṃ su bhūtūpajīvanti4 ye pāṇā paṭhaviṃsitāti.

1. Corehyahāriyanti - machasaṃ. Corehahāriyaṃ -sīmu2. 2. Pasavato - syā. Sīmu. Pathavato-[pts 3.] Paramā-syā. [Pts] sīmu. 1 4. Bhūtā upajīvanti - machasaṃ. Syā. [Pts]

[BJT Page 068] [\x 68/]

(Bhagavā:) puttā vatthu manussānaṃ bhariyāva1 paramo2 sakhā,
Vuṭṭhiṃ bhūtūpajīvanti3 ye pāṇā paṭhaviṃsitāti. 4

1. 6. 5
Paṭhamajanetisuttaṃ
(Devatā:)
55. Kiṃ su janeti purisaṃ kiṃ su tassa vidhāvati,
Kiṃ su saṃsāramāpādi kiṃ su tassa mahabbhayanti.

(Bhagavā:) taṇhā janeti purisaṃ cittamassa vidhāvati,
Satto saṃsāramāpādi dukkhamassa mahabbhayanti.

1. 6. 6.
Dutiyajanetisuttaṃ
(Devatā:)
56. Kiṃ su janeti purisaṃ kiṃ su tassa vidhāvati,
Kiṃ su saṃsāramāpādi kismā na parimuccatīti.

(Bhagavā) taṇhā janeti purisaṃ cittamassa vidhāvati,
Satto saṃsāramāpādi dukkhā na parimuccatīti.

1. 6. 7
Tatiyajanetisuttaṃ
(Devatā:)

57. [PTS Page 038. [\q 38/] ] Kiṃ su janeti purisaṃ kiṃ su tassa vidhāvati,
Kiṃ su saṃsāramāpādi kiṃ su tassa parāyaṇanti.

(Bhagavā:)
Taṇhā janeti purisaṃ cittamassa vidhāvati,
Satto saṃsāramāpādi kammaṃ tassa parāyaṇanti.

1. Bhariyā ca - machasaṃ. [Pts 2.] Paramā - syā. [Pts.] Sīmu. 1 3. Bhūtā upajīvantimachasaṃ. Syā. [Pts 4.] Paṭhavissitā - machasaṃ

[BJT Page 070] [\x 70/]

1. 6. 8.
Uppathasuttaṃ
(Devatā:)
58. Kiṃ su uppatho akkhāto kiṃ su rattindivakkhayo,
Kiṃ malaṃ brahmacariyassa kiṃ sinānamanodakanti.

(Bhagavā:) rāgo uppatho akkhāto1 vayo rattindivakkhayo,
Itthimalaṃ brahmacariyassa etthāyaṃ sajjate pajā,
Tapo ca brahmacariyañca taṃ sinānamanodakanti.

1. 6. 9.
Dutiyāsuttaṃ
(Devatā:)
59. Kiṃ su dutiyā2 purisassa hoti kiṃ su venaṃ pasaṃsati,
Kissa cābhirato macco sabbadukkhā pamuccatīti.

(Bhagavā:) saddhā dutiyā purisassa hoti paññā cenaṃ pasaṃsati,
Nibbāṇābhirato macco sabbadukkhā pamuccatīti.

1. 6. 10
Kavisuttaṃ
(Devatā:)

60. Kiṃ su nidānaṃ gāthānaṃ kiṃ su tāsaṃ viyañjanaṃ,
Kiṃ su sannissitā gāthā kiṃ su gāthānamāsayo.

(Bhagavā:)
Chando nidānaṃ gāthānaṃ akkharā tāsaṃ viyañjanaṃ,
Nāmasannissitā gāthā kavi gāthānamāsayo.

Jarāvaggo chaṭṭho.
Tatruddānaṃ:

Jarā ajarasā mittaṃ vatthu tīṇī janeti ca,
Uppatho ca dutiyā ca kavinā pūrito vaggoti.

1. Akkhāti. - Syā. [Pts 2.] Dutiyaṃ - syā. *Dutiya uppathasuttaṃ. Sīmu. 2.
[BJT Page 72.] [\x 72/]
7. Anvavaggo
1. 7. 1.
Nāma(anvabhavi)suttaṃ
61. Sāvatthiyaṃ -

(Devatā:) [PTS Page 0039 [\q 39/] .] Kiṃsu sabbaṃ anvabhavi1 kismā bhiyyo2 na vijjati,
Kissassa3 ekadhammassa sabbeva vasamanvagūti.

(Bhagavā:) nāmaṃ sabbaṃ anvabhavi1 nāmā bhiyyo na vijjati,
Nāmassa ekadhammassa sabbeva vasamanvagūti.

1. 7. 2.
Cittasuttaṃ
(Devatā:)
62. Kenassu nīyati loko kenassu parikassati, 4
Kissassa3 ekadhammassa sabbeva vasamanvagūti.

(Bhagavā:) cittena nīyati loko cittena parikassati, 4
Cittassa ekadhammassa sabbeva vasamanvagūti.

1. 7. 3
Taṇhāsuttaṃ
(Devatā:)
63. Kenassu nīyati loko kenassu parikassati, 4
Kissassa3 ekadhammassa sabbeva vasamanvagūti,

(Bhagavā:) taṇhāya nīyati loko taṇhāya parikassati, 4
Taṇhāya ekadhammassa sabbeva vasamanvagūti.

1. 7. 4.
Saṃyojanasuttaṃ

(Devatā:)
64. Kiṃ su saṃyojano loko kiṃ su tassa vicāraṇaṃ,
Kissassa3 vippahāṇena nibbāṇamiti vuccatīti.

1. Anvabhavī-sīmu. 2. Bhīyo. -Itipi. 3. Kissassu-machasaṃ, [pts. 4.] Parikissati-syā. [Pts.]
[BJT Page 74] [\x 74/]
(Bhagavā:) nandi1 saṃyojano loko vitakkassa vicāraṇaṃ,
Taṇhāya vippahāṇena nibbāṇamiti vuccatīti.

1. 7. 5
Bandhanasuttaṃ
(Devatā:)
65. Kiṃsu sambandhano loko kiṃsu tassa vicāraṇaṃ,
Kissassa vippahāṇena sabbaṃ chindati bandhananti.

(Bhagavā:) [PTS Page 040. [\q 40/] ] Nandi1 sambandhano loko vitakkassa vicāraṇaṃ,
Taṇhāya vippahāṇena sabbaṃ chindati bandhananti.

1. 7. 6
Abbhāhatasuttaṃ
(Devatā:)
66. Kenassubbhāhato loko kenassu parivārito,
Kena sallena otiṇṇo kissa dhūmāyito2 sadāti.

(Bhagavā:) maccunā'bbhāhato loko jarāya parivārito,
Taṇhāsallena otiṇṇo icchādhūmāyito2 sadāti.

1. 7. 7.
Uḍḍitasuttaṃ
(Devatā:)
67. Kenassu uḍḍito loko kenassu parivārito,
Kenassu pihito loko kismiṃ loko patiṭṭhitoti.

(Bhagavā:) taṇhāya uḍḍito loko jarāya parivārito,
Maccunā pihito loko dukkhe loko patiṭṭhitoti.

1. 7. 8.
Pihitasuttaṃ
(Devatā:)
68. Kenassu pihito loko kismiṃ loko patiṭṭhito,
Kenassu uḍḍito loko kenassu parivāritoti.

1. Nandi-machasaṃ. [Pts 2.] Dhūpāyito - machasaṃ. Syā. [Pts]

[BJT Page 076] [\x 76/]
(Bhagavā:) maccunā pihito loko dukkhe loko patiṭṭhito,
Taṇhāya uḍḍito loko jarāya parivārito.

1. 7. 9.
Icchāsuttaṃ
(Devatā:)
69. Kenassu bajjhati loko kissa vinayāya muccati,
Kissassa vippahāṇena sabbaṃ chindati bandhananti.

(Bhagavā:) icchāya bajjhati loko icchāvinayāya muccati,
Icchāya vippahāṇena sabbaṃ chindati bandhananti.

1. 7. 10
Lokasuttaṃ
(Devatā:)
70. [PTS Page 041. [\q 41/] ] Kismiṃ loko samuppanno kismiṃ kubbati santhavaṃ,
Kissa loko upādāya kismiṃ loko vihaññatīti.

(Bhagavā:) chassu1 loko samuppanno chassu1 kubbati santhavaṃ,
Channameva upādāya chassu1 loko vihaññatīti.

Anvavaggo sattamo.
Tatruddānaṃ:
Nāmaṃ cittañca taṇhā ca saṃyojanañca bandhanā,
Abbhāhatuḍḍito pihito icchā lokena te dasāti.

8. Jhatvā2 vaggo
1. 8. 1.
Jhatvāsuttaṃ
71. Sāvatthiyaṃ-
Ekamantaṃ ṭhitā kho sā devatā bhagavantaṃ gāthāya ajjhabhāsi.

Kiṃ su jhatvā2 sukhaṃ seti kiṃ su jhatvā2 na socati,
Kissassa ekadhammassa vadhaṃ rocesi gotamāti.

1. Chasu-machasaṃ. Syā. [Pts. 2.] Chetvā -machasaṃ. [Pts.] Ghatvā - syā.

[BJT Page 078] [\x 78/]
(Bhagavā:) kodhaṃ jhatvā1 sukhaṃ seti kodhaṃ jhatvā1 na socati,
Kodhassa visamūlassa madhuraggassa devate,
Vadhaṃ ariyā pasaṃsanti taṃ hi jhatvā1 na socatīti.

1. 8. 2.
Rathasuttaṃ
(Devatā:)
72. Kiṃ su rathassa paññāṇaṃ kiṃ su paññāṇamaggino,
Kiṃ su raṭṭhassa paññāṇaṃ kiṃ su paññāṇamitthiyāti.

(Bhagavā:) [PTS Page 042. [\q 42/] ] Dhajo rathassa paññāṇaṃ dhūmo paññāṇamaggino,
Rājā raṭṭhassa paññāṇaṃ bhattā paññāṇamitthiyāti.

1. 8. 3.
Vittasuttaṃ.
(Devatā:)
73. Kiṃ sūdha vittaṃ purisassa seṭṭhaṃ kiṃ su suciṇṇo sukhamāvahāti,
Saccaṃ have sādutaraṃ rasānaṃ paññājīviṃ jīvitamāhu3 seṭṭhanti.

1. 8. 4.
Vuṭṭhisuttaṃ.
(Devatā:) kiṃ su uppatataṃ seṭṭhaṃ kiṃ su nipatataṃ varaṃ,
74. Kiṃ su pavajamānānaṃ kiṃ su pavadataṃ varanti.

(Aparā devatā:)
Bījaṃ uppatataṃ seṭṭhaṃ vuṭṭhi nipatataṃ varā,
Gāvo pavajamānānaṃ putto pavadataṃ varoti.

(Bhagavā:) vijjā uppatataṃ seṭṭhā avijjā nipatataṃ varā,
Saṅgho pavajamānānaṃ buddho pavadataṃ varoti.

1. Chetvaṃ-machasaṃ. [Pts] ghatvā-syā. 2. Sādhutaraṃ - syā. 3. Jivijīvitaṃ-syā.
[BJT Page 080] [\x 80/]
1. 8. 5
Bhītasuttaṃ.
(Devatā:)
75. Kiṃ sūdha bhītā janatā anekā maggo ca nekāyatanaṃ pavutto,
Pucchāmi taṃ gotama bhūripañña kismiṃ ṭhito paralokaṃ na bhāyeti.

(Bhagavā:) vācaṃ manañca paṇidhāya sammā kāyena pāpāni akubbamāno,
Bavhannapānaṃ1 gharamāvasanto [PTS Page 043. [\q 43/] ] Saddho mudū saṃvibhāgī vadaññū,
Etesu dhammesu ṭhito catūsu dhamme ṭhito paralokaṃ na bhāyeti.

1. 8. 6.
Najīratisuttaṃ
(Devatā:)
76. Kiṃ su jīrati2 kiṃ na jīrati kiṃ su uppathoti vuccati,
Kiṃ su dhammānaṃ paripantho kiṃ su rattindivakkhayo,
Kiṃ malaṃ brahmacariyassa kiṃ sinānamanodakaṃ.

Kati lokasmiṃ chiddāni yattha cittaṃ na tiṭṭhati,
Bhagavantaṃ puṭṭhumāgamma kathaṃ jānemu taṃ mayanti.

(Bhagavā:) rūpaṃ jīrati maccānaṃ nāmagottaṃ na jīrati,
Rāgo uppathoti vuccati lobho dhammānaṃ paripantho,
Vayo rattindivakkhayo itthimalaṃ brahmacariyassa etthāyaṃ sajjate pajā
Tapo ca brahmacariyañca taṃ sinānamanodakaṃ,
Cha lokasmiṃ chiddāni yattha cittaṃ na tiṭṭhati,
Ālassaṃ3 ca pamādo ca anuṭṭhānaṃ asaṃyamo,
Niddā tandi ca4 te chidde sabbaso taṃ vivajjayeti.

1. 8. 7
Issarasuttaṃ
(Devatā:)
77. Kiṃ su issariyaṃ loke kiṃ su bhaṇḍānamuttamaṃ,
Kiṃ su satthamalaṃ loke kiṃ su lokasmiṃ abbudaṃ5.

Kiṃ su harantaṃ vārenti haranto pana ko piyo,
Kiṃ su punappunāyantaṃ abhinandanti paṇḍitāti.

1. Bahunnapānaṃ-syā. Bahvannapānaṃ - machasaṃ, . [Pts 2.] Kiṃ chīrati -machasaṃ. [Pts]
3. Ālasyaṃ - machasaṃ syā. 4. Tandi-machasaṃ. Syā [pts. 5.] Abbudā-sīmu2.

[BJT Page 082. [\x 82/] ]
(Bhagavā:) vaso issariyaṃ loke itthi bhaṇḍānamuttamaṃ,
Kodho satthamalaṃ loke corā lokasmiṃ abbudaṃ1

Coraṃ harantaṃ vārenti haranto samaṇo piyo,
Samaṇaṃ punappunāyantaṃ abhinandanti paṇḍitāti.

1. 8. 8
Kāmasuttaṃ
(Devatā:)
78. [PTS Page 044. [\q 44/] ] Kimatthakāmo na dade kiṃ macco na pariccaje,
Kiṃ su muñceyya2 kalyāṇaṃ pāpika3ñca na mocayeti4

(Bhagavā:) attānaṃ na dado poso attānaṃ na pariccaje,
Vācaṃ muñceyya2 kalyāṇaṃ pāpikañca3 na mocayeti4.

1. 8. 9.
Pātheyyasuttaṃ
(Devatā:)
79. Kiṃ su bandhati pātheyyaṃ kiṃ su bhogānamāsayo,
Kiṃ su naraṃ parikassati kiṃ su lokasmiṃ dujjahaṃ,
Kismiṃ baddhā puthu5 sattā pāsena sakuṇī yathāti.

(Bhagavā:) saddhā bandhati pātheyyaṃ siri bhogānamāsayo,
Icchā naraṃ parikassati icchā lokasmiṃ dujjahā,
Icchābaddhā puthu5 sattā pāsena sakuṇī yathāti.

1. 8. 10
Pajjotasuttaṃ
(Devatā:)
80. Kiṃ su lokasmiṃ6 pajjoto kiṃ su lokasmiṃ6 jāgaro,
Kiṃ su kamme sajīvānaṃ kimassa iriyāpatho.

Kiṃ su alasaṃ analasañca mātā puttaṃva posati,
Kiṃ su bhūtūpajīvanti ye pāṇā paṭhaviṃsitāti.

1. Abbudā-sīmu. 2. 2. Mucceyya-syā. Sīmu. 2. [Pts 3.] Pāpiyaṃ-syā. Sīmu. 1. [Pts.] Na ca mocaye-machasaṃ. 5. Puthū - machasaṃ. Syā. 6. Lokasmi - machasaṃ. Syā

[BJT Page 084] [\x 84/]
(Bhagavā:) paññā lokasmiṃ 1 pajjoto sati lokasmiṃ1 jāgaro,
Gāvo kamme sajīvānaṃ sītassa iriyāpatho.

Vuṭṭhi alasaṃ analasañca mātā puttaṃva posati,
Vuṭṭhiṃ bhūtūpajīvanti ye pāṇā paṭhaviṃsitāti.

1. 8. 11.
Araṇasuttaṃ
(Devatā:)
81. Ke sūdha araṇā loke kesaṃ vusitaṃ na nassati,
Kedha icchaṃ parijānanti kesaṃ bhojissiyaṃ2 sadā.

[PTS Page 045. [\q 45/] ] Kiṃ su mātā pitā bhātā vandantī naṃ patiṭṭhitaṃ,
Kiṃ su idha jātihīnaṃ abhivādenti khattiyāti.

(Bhagavā:) samaṇīdha araṇā loke samaṇānaṃ vusitaṃ na nassati.
Samaṇā icchaṃ parijānanti samaṇānaṃ bhojissiyaṃ2 sadā.

Samaṇaṃ mātā pitā bhātā vandanti naṃ patiṭṭhitaṃ,
Samaṇīdha jātihīnaṃ abhivādenti khattiyāti.

Jhatvāvaggo aṭṭhamo.

Tatruddānaṃ:
Jhatvā rathañca cittañca vuṭṭhi bhītā na jīrati,
Issaraṃ kāmaṃ pātheyyaṃ pajjoto araṇenavāti.

Devatāsaṃyuttaṃ samattaṃ.

1. Lokasmiṃ-machasaṃ, syā. 2. Bhojisiyaṃ-syā. [Pts]

[BJT Page 086] [\x 86/]
2. Devaputtasaṃyuttaṃ.

1. Suriyavaggo.
2. 1. 1
Paṭhamakassapasuttaṃ
82. [PTS Page 046. [\q 46/] ] Evaṃ me sutaṃ: ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Atha kho kassapo devaputto abhikkantāya rattiyā abhikkantavaṇṇo kevalakappaṃ jetavanaṃ obhāsetvā yena bhagavā tenupasaṅkami. Upasaṅkamitvā bhagavantaṃ abhivādetvā ekamantaṃ aṭṭhāsi.

Ekamantaṃ ṭhito kho kassapo devaputto bhagavantaṃ etadavoca: "bhikkhuṃ bhagavā pakāsesi. No ca bhikkhuno anusāsaninti. "1.

(Bhagavā:)
Tena hi kassapa taññevettha paṭibhātūti.
(Kassapadevaputto:)
"Subhāsitassa sikkhetha samaṇūpāsanassa ca,
Ekāsanassa ca raho cittavūpasamassa cāti. "

Idamavoca kassapo devaputto samanuñño satthā ahosi.
Atha kho kassapo devaputto samanuñño me satthāti bhagavantaṃ
Abhivādetvā padakkhiṇaṃ katvā tatthevantaradhāyīti.

2. 1. 2.
Dutiyakassapasuttaṃ
83. Sāvatthiyaṃ-
Ekamantaṃ ṭhito kho kassapo devaputto bhagavato santike imaṃ gāthaṃ abhāsi:

Bhikkhu siyā jhāyī vimuttacitto ākaṅkhe ce hadayassānupattiṃ,
Lokassa ñatvā udayabbayañca sucetaso anissito tadānisaṃsoti.

1. Anusāsanti-katthaci.

[BJT Page 088] [\x 88/]
2. 1. 3.
Māghasuttaṃ

84. Sāvatthiyaṃ

[PTS Page 047. [\q 47/] ] Atha kho māgho devaputto abhikkantāya rattiyā abhikkantavaṇṇo kevalakappaṃ jetavanaṃ obhāsetvā yena bhagavā tenupasaṅkami. Upasaṅkamitvā bhagavantaṃ abhivādetvā ekamantaṃ aṭṭhāsi. Ekamantaṃ ṭhito kho māgho devaputto bhagavantaṃ gāthāya ajjhabhāsi:

Kiṃ su jhatvā sukhaṃ seti kiṃ su jhatvā na socati,
Kissassa ekadhammassa vadhaṃ rocesi gotamāti.

(Bhagavā:) kodhaṃ jhatvā sukhaṃ seti kodhaṃ jhatvā na socati,
Kodhassa visamūlassa madhuraggassa vatrabhū,
Vadhaṃ ariyā pasaṃsanti taṃ hi jhatvā na socatīti.

2. 1. 4
Māgadhasuttaṃ
85. Sāvatthiyaṃ-
Ekamantaṃ ṭhito kho māgadho devaputto bhagavantaṃ gāthāya ajjhabhāsi: kati lokasmiṃ pajjotā yehi loko pakāsati.
Bhagavantaṃ puṭṭhumāgamma kathaṃ jānemu taṃ mayanti,

(Bhagavā:) cattāro loke pajjotā pañcamettha na vijjati,
Divā tapati ādicco rattiṃ ābhāti candimā.

Atha aggi divārattiṃ tattha tattha pakāsati,
Sambuddho tapataṃ seṭṭho esā ābhā anuttarāti.

2. 1. 5.
Dāmalisuttaṃ

86. Sāvatthiyaṃ-
Atha kho dāmali devaputto abhikkantāya rattiyā abhikkantavaṇṇo kevalakappaṃ jetavanaṃ obhāsetvā yena bhagavā tenupasaṅkami. Upasaṅkamitvā bhagavantaṃ abhivādetvā ekamantaṃ aṭṭhāsi. Ekamantaṃ ṭhito kho dāmali devaputto bhagavato santike imaṃ gāthaṃ abhāsi.

[BJT Page 090] [\x 90/]

Karaṇīyametaṃ 1 brāhmaṇena padhānamakilāsunā2,
Kāmānaṃ vippahāṇena na tenāsiṃsate3 bhavanti.

Natthi kiccaṃ brāhmaṇassa ( dāmalīti bhagavā) katakicco hi brāhmaṇo,
Yāva na gādhaṃ labhati [PTS Page 048. [\q 48/] ] Nadīsu āyūhati sabbagattehi jantu
Gādhañca laddhāna thale ṭhito so nāyūhati pāragato hi soti4

Esūpamā dāmali brāhmaṇassa khīṇāsavassa nipakassa jhāyino,
Pappuyya jātimaraṇassa antaṃ nāyūhati pāragato hi soti.

2. 1. 6
Kāmadasuttaṃ
87. Sāvatthiyaṃ -
Ekamantaṃ ṭhito kho kāmado devaputto bhagavantaṃ etadavoca:
Dukkaraṃ bhagavā sudukkaraṃ bhagavāti,

Dukkaraṃ cāpi karonti (kāmadāti bhagavā)
Sekhā5 sīlasamāhitā,
Ṭhitattā anagāriyupetassa
Tuṭṭhi hoti sukhāvahāti.

Dullabhā bhagavā yadidaṃ tuṭṭhīti.

Dullabhaṃ vāpi labhanti (kāmadāti bhagavā)
Cittavūpasame ratā,
Yesaṃ divā ca ratto ca
Bhāvanāya rato manoti,

Dussamādahaṃ bhagavā yadidaṃ cittanti.

Dussamādahaṃ vāpi samādahanti(kāmadāti bhagavā)
Indriyūpasame ratā,
Te chetvā maccuno jālaṃ
Ariyā gacchanti kāmadāti.

Duggamo bhagavā visamo maggoti,

(Bhagavā:)

Duggame visame vāpi
Ariyā gacchanti kāmada,
Anariyā visame magge
Papatanti avaṃsirā,
Ariyānaṃ samo maggo
Ariyā hi visame samāti.

1. Karaṇīyamettha-[pts 2.] Padhānaṃ akilāsunā-machasaṃ. 3. Na tenāsīsate -machasaṃ. [Pts 4.] Sova - machasaṃ 5. Sekkhā -syā

[BJT Page 092] [\x 92/]

2. 1. 7
Pañcālacaṇḍasuttaṃ
88. Sāvatthiyaṃ-

Ekamantaṃ ṭhito ko pañcālacaṇḍo devaputto bhagavato santike imaṃ gāthaṃ abhāsi:

Sambādhe vata okāsaṃ avindi bhūrimedhaso,
Yo jhānambudhā1 buddho patilīnanisabho munīti.

Sambādhe vāpi vindanti2(pañcālacaṇḍāti bhagavā) dhammaṃ nibbāṇapattiyā,
Ye satiṃ paccalatthuṃ su3 sammā te susamāhitāti.

2. 1. 8.
Tāyanasuttaṃ
89. Sāvatthiyaṃ-
[PTS Page 049. [\q 49/] ] Atha kho tāyano devaputto purāṇatitthakaro abhikkantāya rattiyā abhikkantavaṇṇo kevalakappaṃ jetavanaṃ obhāsetvā yena bhagavā tenupasaṅkami, upasaṅkamitvā bhagavantaṃ abhivādatvā ekamantaṃ aṭṭhāsi. Ekamantaṃ ṭhito kho tāyano devaputto bhagavato santike imā gāthāyo abhāsi:

Chinda sotaṃ parakkamma kāme panuda4 brāhmaṇa,
Nappahāya munī kāme nekattamupapajjati.

Kayirā ce kayirāthenaṃ daḷhamenaṃ parakkame,
Sithilohi paribbājo bhiyyo ākirate rajaṃ.

Akataṃ dukkataṃ5 seyyo pacchā tapati6 dukkataṃ,
Katañca sukataṃ seyyo yaṃ katvā nānutappati.

Kuso yathā duggahito hatthamevānukantati,
Sāmaññaṃ dupparāmaṭṭhaṃ nirayāyūpakaḍḍhati.

Yaṃ kiñci sithilaṃ kammaṃ saṃkiliṭṭhañca yaṃ vataṃ,
Saṃkassaraṃ brahmacariyaṃ na taṃ hoti mahapphalanti.

Idamavo ca tāyano devaputto idaṃ vatvā bhagavantaṃ abhivādetvā padakkhiṇaṃ katvā tatthevantaradhāyīti.

1. Jhānamabujjha- machasaṃ. Jhānamabuddha- syā. [Pts. 2.] Picaniṭṭhani-syā. 3. Paccalatthaṃsu-machasaṃ[pts] paccacalabbhaṃsusyā. Paccaladdhaṃsu-sīmu. 4. Panūda-sā. 5 Dukkaṭaṃ-machasaṃ. Syā 6. 2. Tappati-syā.

[BJT Page 094] [\x 94/]

Atha kho bhagavā tassā rattiyā accayena bhikkhū āmantesi: imaṃ bhikkhave rattiṃ tāyano nāma devaputto purāṇatitthakaro abhikkantāya rattiyā abhikkantavaṇṇo kevalakappaṃ jetavanaṃ obhāsetvā yenāhaṃ tenupasaṅkami. Upasaṅkamitvā maṃ abhivādetvā ekamantaṃ aṭṭhāsi. Ekamantaṃ ṭhito bhikkhave tāyano1 devaputto mama santike imā gāthāyo abhāsi:

Chinda sotaṃ parakkamma kāme panuda4 brāhmaṇa,
Nappahāya muni kāme nekattamupapajjati.

Kayirā ce kayirāthenaṃ daḷhamenaṃ parakkame,
[PTS Page 050. [\q 50/] ] Sithilohi paribbājo bhiyyo ākirate rajanti.

Akataṃ dukkataṃ5 seyyo pacchā tapati dukkataṃ,
Katañca sukataṃ seyyo yaṃ katvā nānutappati.

Kuso yathā duggahito hatthamevānukantati,
Sāmaññaṃ dupparāmaṭṭhaṃ nirayāyūpakaḍḍhati.

Yaṃ kiñci sithilaṃ kammaṃ saṃkiliṭṭhañca yaṃ vataṃ,
Saṅkassaraṃ brahmacariyaṃ na taṃ hoti mahapphalanti.

Idamavo ca tāyano devaputto idaṃ vatvā maṃ abhivādetvā padakkhiṇaṃ katvā tatthevantaradhāyi.

Uggaṇhātha bhikkhave, tāyanagāthā, pariyāpuṇātha bhikkhave, tāyanagāthā. Dhāretha bhikkhave, tāyanagāthā. Atthasaṃhitā bhikkhave, tāyanagāthā. Ādibrahmacariyikāti, 2.
2. 1. 9.
Candimasuttaṃ.
90. Sāvatthiyaṃ-

Tena kho pana samayena candimā devaputto rāhunā asurindena gahito hoti. Atha kho candimā devaputto bhagavantaṃ anussaramāno tāyaṃ velāyaṃ imaṃ gāthaṃ abhāsi:

"Namo te buddhavīratthu vippamuttosi sabbadhi,
Sambādhapaṭipannosmi tassa me saraṇaṃ bhavāti. "

Atha kho bhagavā candimaṃ devaputtaṃ ārabbha rāhuṃ asurindaṃ gāthāya ajjhabhāsi:

"Tathāgataṃ arahantaṃ candimā saraṇaṃ gato
Rāhu candaṃ pamuñcassu buddhā lokānukampakāti. "

1. Ṭhito kho tāyano - sīmu. Syā. [Pts 2.] Cariyakāsyā.

[BJT Page 096] [\x 96/]

Atha kho rāhu asurindo candimaṃ devaputtaṃ muñcitvā taramānarūpo yena vepacitti asurindo tenupasaṅkami. Upasaṅkamitvā saṃviggo lomahaṭṭhajāto ekamantaṃ aṭṭhāsi. Ekamantaṃ ṭhitaṃ kho rāhuṃ asurindaṃ vepacitti asurindo gāthāya ajjhabhāsi:

Kinnu santaramānova rāhu candaṃ pamuñcasi,
Saṃviggarūpo āgamma kinnu bhīto va tiṭṭhasīti.

Sattadhā me phale muddhā jīvanto na sukhaṃ labhe,
Buddhagāthābhigītomhi no ce muñceyya candimanti.

2. 1. 10
Suriya1suttaṃ.
91. Sāvatthiyaṃ-
[PTS Page 051. [\q 51/] ] Tena kho pana samayena suriyo1 devaputto rāhunā asurindena gahito hoti. Atha kho suriyo1 devaputto bhagavantaṃ anussaramāno tāyaṃ velāyaṃ imaṃ gāthaṃ abhāsi:-

"Namo te buddhavīratthu vippamuttosi sabbadhi,
Sambādhapaṭipannosmi tassa me saraṇaṃ bhavāti. "

Atha kho bhagavā suriyaṃ devaputtaṃ ārabbha rāhuṃ asurindaṃ gāthāhi2 ajjhabhāsi:-
"Tathāgataṃ arahantaṃ suriyo1 saraṇaṃ gato,
Rāhu suriyaṃ1 pamuñcassu buddhā lokānukampakāti.

Yo andhakāre tamasī3 pabhaṅkaro verocano maṇḍalī uggatejo,
Mā rāhu gilī caraṃ antalikkhe4 pajaṃ mama rāhu pamuñca suriyanti, "

Atha kho rāhu asurindo suriyaṃ1 devaputtaṃ muñcitvā taramānarūpo yena vepacitti asurindo tenupasaṅkami. Upasaṅkamitvā saṃviggo lomahaṭṭhajāto ekamantaṃ aṭṭhāsi. Ekamantaṃ ṭhitaṃ kho rāhuṃ asurindaṃ vepacitti asurindo gāthāya ajjhabhāsi:

" Kinnusantaramānova rāhu suriyaṃ pamuñcasi,
Saṃviggarūpo āgamma kinnu bhītova tiṭṭhasīti.

"Sattadhā me phale muddhā jīvanto na sukhaṃ labhe,
Buddhagāthābhi gītomhi no ce muñceyya suriyanti. "

Suriyavaggo paṭhamo

Tatruddānaṃ

Dve kassapā ca māgho ca māgadho dāmali kāmado,
Pañcālacaṇḍo tāyano candimasuriyena te dasāti.

1. Sūriya-machasaṃ 2. Gāthāya - syā. 3. Tamasi-machasaṃ. 4. Caramantalikkhe-machasaṃ.
[BJT Page 098] [\x 98/]

2. Anāthapiṇḍikavaggo.
2. 2. 1
Candimasasuttaṃ.
92. Sāvatthiyaṃ-

Atha kho candimaso devaputto abhikkantāya rattiyā abhikkantavaṇṇo kevalakappaṃ jetavanaṃ obhāsetvā yena [PTS Page 052. [\q 52/] ] Bhagavā tenupasaṅkami. Upasaṅkamitvā bhagavantaṃ abhivādetvā ekamantaṃ aṭṭhāsi. Ekamantaṃ ṭhito kho candimaso devaputto bhagavato santike imaṃ gāthaṃ abhāsi:

Te hi sotthiṃ gamissanti kacchevāmakase magā,
Jhānāni upasampajja ekodī nipakā satāti.

(Bhagavā:) te hi pāraṃ gamissanti chetvā jālaṃ va ambujo,
Jhānāni upasampajja appamattā raṇañjahāti.

2. 2. 2. Veṇhu1suttaṃ.

93. Sāvatthiyaṃ-

Ekamantaṃ ṭhito kho veṇhu1 devaputto bhagavato santike imaṃ gāthaṃ abhāsi:

Sukhitā vata2 te manujā sugataṃ payirupāsiya,
Yuñjaṃ3 gotama sāsane appamattānusikkhareti.

Ye me pavutte4 satthipade5 (veṇhoti bhagavā) anusikkhanti jhāyino,
Kāle te appamajjantā na maccuvasagā6 siyunti.

2. 2. 3.
Dīghalaṭṭhisuttaṃ.

94. Sāvatthiyaṃ-

Evaṃ me sutaṃ ekaṃ samayaṃ bhagavā rājagahe viharati vephavane kalandakanivāpe.

Atha kho dīghalaṭṭhi devaputto abhikkantāya rattiyā abhikkantavaṇṇo kevalakappaṃ vephavanaṃ obhāsetvā yena bhagavā tenupasaṅkami. Upasaṅkamitvā bhagavantaṃ abhivādetvā ekamantaṃ aṭṭhāsi. Ekamantaṃ ṭhito kho dīghalaṭṭhi devaputto bhagavantaṃ gāthāya ajjhabhāsi7:

Bhikkhu siyā jhāyī vimuttacitto ākaṅkhe ce hadayassānupattiṃ,
Lokassa ñatvā udayabbayañca sucetaso anissito tadānisaṃsoti.

1. Veṇaḍu - syā. [Pts.] Machasaṃ 2. Sukhitāva-machasaṃ. [Pts 3.] Yuñja-syā. 4. Vutte-syā. 5. Saṭṭhapade-machasaṃ. 6. Vasaṅgā - [pts 7.] Bhagavato santike. Imaṃ gāthaṃ abhāsi-machasaṃ. Syā.

[BJT Page 100] [\x 100/]
2. 2. 4
Nandanasuttaṃ

95. Sāvatthiyaṃ-
Ekamantaṃ ṭhito kho nandano devaputto bhagavantaṃ gāthāya ajjhabhāsi:-

Pucchāmi taṃ gotama bhūripañña
Anāvaṭaṃ bhagavato ñāṇadassanaṃ
[PTS Page 053. [\q 53/] ] Kathaṃvidhaṃ sīlavantaṃ vadanti.
Kathaṃvidhaṃ paññavantaṃ1 vadanti
Kathaṃvidho dukkhamaticca irīyati. 2
Kathaṃvidhaṃ devatā pūjayantīti.

(Bhagavā:) yo sīlavā paññavā bhāvitatto
Samāhito jhānarato satīmā,
Sabbassa sokā vigatā pahīṇā
Khīṇāsavo antimadehadhārī

Tathāvidhaṃ sīlavantaṃ vadanti
Tathāvidhaṃ paññavantaṃ3 vadanti.
Tathāvidho dukkhamaticca irīyati
Tathāvidhaṃ devatā pūjayantīti.

2. 2. 5
Candanasuttaṃ.
96. Sāvatthiyaṃ-

Ekamantaṃ ṭhito kho candano devaputto bhagavantaṃ gāthāya ajjhabhāsi:-

Ko sū4dha taratī oghaṃ rattindivamatandito
Appatiṭṭhe anālambe ko gambhīre na sīdatīti.

(Bhagavā. )
Sabbadā sīlasampanno paññavā susamāhito,
Āraddhaviriyo pahitatto oghaṃ tarati duttaraṃ

Virato kāmasaññāya rūpasaññojanātigo,
Nandirāgaparikkhīṇo5 so gambhīre na sīdatīti.

2. 2. 6.
Vasudattasuttaṃ. 6
97. Sāvatthiyaṃ-

Ekamantaṃ ṭhito kho vasudatto6 devaputto bhagavato santike imaṃ gāthaṃ abhāsi:
1. Bhūripaññaṃ-[pts 2.] Iriyati. - Machasaṃ. Syā. [Pts 3.] Paññavantaṃ-[pts 4.] Kathaṃsu-machasaṃ syā. [Pts 5.] Nandībhava-sī1. Syā -[pts. 6.] Sudattasuttaṃ-sīmu. 2
[BJT Page 102] [\x 102/]

Sattiyā viya omaṭṭho ḍayhamānova1 matthake,
Kāmarāgappahāṇāya sato bhikkhu paribbajeti.

(Bhagavā:) sattiyā viya omaṭṭho ḍayhamānova matthake,
Sakkāyadiṭṭhippahāṇāya sato bhikkhu paribbajeti.

2. 2. 7
Subrahmasuttaṃ,

98. Sāvatthiyaṃ-

Ekamantaṃ ṭhito kho subrahmā devaputto bhagavantaṃ gāthāya ajjhabhāsi:-

Niccaṃ utrastamidaṃ cittaṃ niccaṃ ubbiggamidaṃ mano
[PTS Page 054. [\q 54/] ] Anuppannesu kicchesu2 atho uppatitesu ca
Sace atthi anutrastaṃ taṃ me akkhāhi pucchito ti.

(Bhagavā:) nāññatra bojjhaṅgā tapasā3 nāññatra indriyasaṃvarā, 4
Nāññatra sabbanissaggā5 sotthiṃ passāmi pāṇinanti. 6.

2. 2. 8.
Kakudhasuttaṃ.

99. Sāvatthiyaṃ-

Evaṃ me sutaṃ ekaṃ samayaṃ bhagavā sākete viharati añjanavane migadāye. Atha kho kakudho devaputto abhikkantāya rattiyā abhikkantavaṇṇo kevalakappaṃ añjanavanaṃ obhāsetvā yena bhagavā tenupasaṅkami. Upasaṅkamitvā bhagavantaṃ abhivādetvā ekamantaṃ aṭṭhāsi. Ekamantaṃ ṭhito kho kakudho devaputto bhagavantaṃ etadavoca:

Nandasi samaṇāti? Kiṃ laddhā āvusoti? Tena hi samaṇa socasīti? Kiṃ jīyittha āvusoti? Tena hi samaṇa neva nandasi neva7 socasīti? Evamāvusoti.

Kacci tvaṃ anagho8 bhikkhu kacci nandi9 na vijjati,
Kacci taṃ ekamāsīnaṃ arati nābhikīratīti.

(Bhagavā:)
Anīgho8 ve ahaṃ yakkha atho nandi na vijjati,
Atho maṃ ekamāsīnaṃ 10 arati nābhikīratīti.

1. Ḍayhamāneva-syā 2. Kiccesu -sīmu. 1. Syā. [Pts. 3.] Bojjhā tapasā-machasaṃ. 4. Nāññatirandriyasaṃvarā -machasaṃ. 5. Sabbanissaṅaṃgā-sī1. 6. Idamavoca-petatthevantaradhāyiti. Machasaṃ. Syā 7. Nava - machasaṃ [pts. 8.] Anigho-sīmu. 2 9. Atho nandi-[pts 10.] Mamekamāsīnaṃ -syā.

[BJT Page 104] [\x 104/]

(Devaputto:)
Kathaṃ tvaṃ anagho1 bhikkhu kathaṃ nandi na vijjati,
Kathaṃ taṃ ekamāsīnaṃ aratī nābhikīratīti.

(Bhagavā:) aghajātassa ve nandi nandijātassa ve aghaṃ,
Anandi anagho1 bhikkhu evaṃ jānāhi āvusoti.

(Devaputto:)
Cirassaṃ vata passāmi2 brāhmaṇaṃ parinibbutaṃ,
Anandiṃ anaghaṃ bhikkhuṃ tiṇṇaṃ loke visattikanti.

2. 2. 9.
Uttarasuttaṃ
100. Rājagahe-

Ekamantaṃ ṭhito kho uttaro devaputto bhagavato santike imaṃ gāthaṃ abhāsi:
[PTS Page 055. [\q 55/] ] Upanīyati jīvitamappamāyu jarūpanītassa na santi tāṇā,
Etaṃ bhayaṃ maraṇe pekkhamāno puññāni kayirātha sukhāvahāni.

(Bhagavā:) upanīyati jīvitamappamāyu jarūpanītassa na santi tāṇā,
Etaṃ bhayaṃ maraṇe pekkhamāno lokāmisaṃ pajahe santipekkhoti.

2. 2. 10
Anāthapiṇḍikasuttaṃ.

101. Sāvatthiyaṃ-

Ekamantaṃ ṭhito kho anāthapiṇḍiko devaputto bhagavato santike imā gāthāyo abhāsi:

Idaṃ hi taṃ jetavanaṃ isisaṅghanisevitaṃ,
Āvutthaṃ dhammarājena pītisañjananaṃ mama.

Kammaṃ vijjā ca dhammo ca sīlaṃ jīvitamuttamaṃ,
Etena maccā sujjhanti na gottena dhanena vā.

Tasmā hi paṇḍito poso sampassaṃ atthamattano,
Yoniso vicine dhammaṃ evaṃ tattha visujjhati.

1. Anīgho-sīmu2 2. Ssāma - sī. 1, 2.

[BJT Page 106] [\x 106/]

Sāriputtova paññāya sīlena upasamena1 ca,
Yopi pāragato2 bhikkhu etāva paramo siyāti.

Idamavoca anāthapiṇḍiko devaputto. Idaṃ vatvā bhagavantaṃ abhivādetvā padakkhiṇaṃ katvā tatthevantaradhāyī. 3

Atha kho bhagavā tassā rattiyā accayena bhikkhū āmantesi. Imaṃ bhikkhave rattiṃ aññataro devaputto abhikkantāya rattiyā abhikkantavaṇṇo kevalakappaṃ jetavanaṃ obhāsetvā yenāhaṃ tenupasaṅkami. Upasaṅkamitvā maṃ abhivādetvā ekamantaṃ aṭṭhāsi. Ekamantaṃ ṭhito kho bhikkhave so devaputto mama santike imā gāthāyo abhāsi:

"Idaṃ hi taṃ jetavanaṃ isisaṅghanisevitaṃ,
Āvutthaṃ dhammarājena pītisañjananaṃ mama.

Kammaṃ vijjā ca dhammo ca sīlaṃ jīvitamuttamaṃ,
Etena maccā sujjhanti na gottena dhanena vā.

Tasmā hi paṇḍito poso sampassaṃ atthamattano,
[PTS Page 056. [\q 56/] ] Yoniso vicine dhammaṃ evaṃ tattha visujjhati.

Sāriputtova paññāya sīlena upasamena ca,
Yopi pāragato2 bhikkhu etāva paramo siyā"ti.

Idamavoca bhikkhave so devaputto idaṃ vatvā maṃ abhivādetvā padakkhiṇaṃ katvā tatthevantaradhāyīti.

Evaṃ vutte āyasmā ānando bhagavantaṃ etadavoca: so hi nūna bhante anāthapiṇḍiko devaputto bhavissati. Anāthapiṇḍiko gahapati āyasmante sāriputte abhippasanno ahosīti.

Sādhu sādhu ānanda yāvatakaṃ kho ānanda takkāya pattabbaṃ anuppattaṃ4 tayā. Anāthapiṇḍiko hi so ānanda devaputtoti.

Anāthapiṇḍikavaggo dutiyo.

Tatruddānaṃ:

Candimaso ca veṇhu ca dīghalaṭṭhi ca nandano
Candano vasudatto ca subrahmā kakudhena ca,
Uttaro navamo vutto dasamo anāthapiṇḍikoti.

1. Sīlenupasamena-[pts.] Sī2. 2. Pāraṅgato - machasaṃ, [pts 3.] Dhāyīti-sīmu. 2. Syā. 4. Anuppattaṃ taṃ - machasaṃ.

[BJT Page 108] [\x 108/]

3. Nānātitthiyavaggo.
2. 3. 1.
Sivasuttaṃ

102. Evaṃ me sutaṃ ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme.

Atha kho sivo devaputto abhikkantāya rattiyā abhikkantavaṇṇo kelakappaṃ jetavanaṃ obhāsetvā yena bhagavā tenupasaṅkami. Upasaṅkamitvā bhagavantaṃ abhivādetvā ekamantaṃ aṭṭhāsi. Ekamantaṃ ṭhito kho sivo devaputto bhagavato santike imā gāthāyo abhāsi:

Sabbhireva samāsetha sabbhi kubbetha santhavaṃ,
Sataṃ saddhammamaññāya seyyo hoti na pāpiyo.

Sabbhireva samāsetha sabbhi kubbetha santhavaṃ,
Sataṃ saddhammamaññāya paññā labbhati nāññato

Sabbhireva samāsetha sabbhi kubbetha santhavaṃ,
Sataṃ saddhammamaññāya sokamajjhe na socati.

Sabbhireva samāsetha sabbhi kubbetha santhavaṃ,
[PTS Page 057. [\q 57/] ] Sataṃ saddhammamaññāya ñātimajjhe virocati

Sabbhireva samāsetha sabbhi kubbetha santhavaṃ,
Sataṃ saddhammamaññāya sattā gacchanti suggatiṃ.

Sabbhireva samāsetha sabbhi kubbetha santhavaṃ,
Sataṃ saddhammamaññāya sattā tiṭṭhanti sātatanti.

Atha kho bhagavā sivaṃ devaputtaṃ gāthāya paccabhāsi:

Sabbhireva samāsetha sabbhi kubbetha santhavaṃ,
Sataṃ saddhammamaññāya sabbadukkhā pamuccatīti.

[BJT Page 110. [\x 110/] ]

2. 3. 2.
Khemasuttaṃ
103. Sāvatthiyaṃ-
Ekamantaṃ ṭhito kho khemo devaputto bhagavato santike imā gāthāyo abhāsi:
Caranti bālā dummedhā amitteneva attanā,
Karontā pāpakaṃ kammaṃ yaṃ hoti kaṭukapphalaṃ.

Na taṃ kammaṃ kataṃ sādhu yaṃ katvā anutappati,
Yassa assumukho rodaṃ vipākaṃ paṭisevati.

Tañca kammaṃ kataṃ sādhu yaṃ katvā nānutappati,
Yassa patīto sumano vipākaṃ paṭisevatīti.

(Bhagavā:)
Paṭigacceva1 taṃ kayirā yaṃ jaññā hitamattano,
Na sākaṭikacintāya mantā dhīro parakkame.

Yathā sākaṭiko patthaṃ2 samaṃ hitvā mahāpathaṃ,
Visamaṃ maggamāruyha akkhacchinnova jhāyati.

Evaṃ dhammā apakkamma adhammamanuvattiya,
Mando maccumukhaṃ patto akkhacchinnova jhāyatīti.

2. 3. 3
Serīsuttaṃ
104. Sāvatthiyaṃ -

Ekamantaṃ ṭhito kho serī devaputto bhagavantaṃ gāthāya ajjhabhāsi:

Annamevābhinandanti ubhaye devamānusā,
Atha ko nāma so yakkho yaṃ annaṃ nābhinandatīti.

(Bhagavā:)
Ye naṃ dadanti saddhāya vippasannena cetasā,
Tameva annaṃ bhajati asmiṃ loke paramhi ca.

Tasmā vineyya maccheraṃ dajjā dānaṃ malābhibhū,
Puññāni paralokasmiṃ patiṭṭhā honti pāṇinanti,

[PTS Page 058. [\q 58/] ] Acchariyaṃ bhante ababhūtaṃ bhante yāvasubhāsitamidaṃ bhante bhagavatā:

1. Paṭikacceva-machasaṃ, syā. [Pts 2.] Maṭṭhaṃ - machasaṃ, pasatthaṃ syā. Yathā sākaṭikonāma milindapañha.

[BJT Page 112. [\x 112/] ]
"Ye naṃ dadanti saddhāya vippasannena cetasā,
Tameva annaṃ bhajati asmiṃ loke paramhi ca.

Tasmā vineyya maccheraṃ dajjā dānaṃ malābhibhū,
Puññāni paralokasmiṃ patiṭṭhā honti pāṇinanti. "

Bhūtapubbāhaṃ bhante seri nāma rājā ahosiṃ dāyako dānapati dānassa vaṇṇavādī. Tassa mayhaṃ bhante catusu1 dvāresu dānaṃ dīyittha samaṇabrāhmaṇakapaṇaddhika vaṇibbakayācakānaṃ. Atha kho maṃ bhante itthāgaraṃ upasaṅkamitvā etadavoca: devasseva2 kho dānaṃ dīyati amhākaṃ dānaṃ na dīyati, sādhu mayampi devaṃ nissāya dānāni dadeyyāma puññāni kareyyāmāti.

Tassa mayhaṃ bhante etadahosi: ahaṃ khosmi dāyako dānapati dānassa vaṇṇavādī. Dānaṃ dassāmāti vadantānaṃ3 kinti vadeyyanti. So khvāhaṃ bhante paṭhamaṃ dvāraṃ itthāgarassa adāsiṃ. Tattha itthāgārassa dānaṃ dīyittha, mama dānaṃ paṭikkami.

Atha kho maṃ bhante khattiyā anuyuttā4 upasaṅkamitvā maṃ etadavocuṃ. Devassa kho dānaṃ dīyati, itthāgārassa dānaṃ dīyati. Amhākaṃ dānaṃ na dīyati. Sādhu mayampi devaṃ nissāya dānāni dadeyyāma, puññāni kareyyāmāti.

Tassa mayhaṃ bhante etadahosi: ahaṃ khosmi dāyako dānapati dānassa vaṇṇavādī. Dānaṃ dassāmāti vadantānaṃ3 kinti vadeyyanti. So khvāhaṃ bhante dutiyaṃ dvāraṃ khattiyānaṃ anuyuttānaṃ7 adāsiṃ. Tattha khattiyānaṃ anuyuttānaṃ dānaṃ diyittha. Mama dānaṃ paṭikkami.

Atha kho maṃ bhante balakāyo upasaṅkamitvā maṃ etadavoca: devassa kho
Dānaṃ dīyati, itthāgārassa dānaṃ dīyati. Khattiyānaṃ anuyuttānaṃ7 dānaṃ dīyati. Sādhu mayampi devaṃ nissāya dānāni dadeyyāma, puññāni kareyyāmāti.

[PTS Page 059. [\q 59/] ] Tassa mayhaṃ bhante etadahosi: ahaṃ khosmi dāyako dānapati dānassa vaṇṇavādī. Dānaṃ dassāmāti vadantānaṃ3 kinti vadeyyanti. So khvāhaṃ bhante tatiyaṃ dvāraṃ balakāyassa adāsiṃ. Tattha balakāyassa dānaṃ dīyittha. Mama dānaṃ paṭikkami.

Atha kho maṃ bhante brāhmaṇagahapatikā upasaṅkamitvā maṃ etadavocuṃ. Devassa kho dānaṃ dīy